那個ㄋㄚˋ ㄍㄜ (Moved)

喺大角咀想食台灣野唔算有好多選擇，前排成日喺ig到知道附近開左間新嘅台灣菜，又見好多人讚，就梗係要黎試下。不過間鋪好細，得16個位，而且都比較窄。之前中午黎過幾次，每次黎到都無位。今日下定決心要早啲，餐廳12點開門，同同事12點正就已經黎到，但竟然已經見到有條隊。未開門已經有人排定隊真係有啲誇張，好好彩我地咁岩係最後一檯，入完後即刻full左，真係遲一步都無得食。餐廳主打台式便當，樣樣都好吸引，因為新開張所以個餐都有優惠價同埋送野飲。我揀左滷排骨便當配紅茶。

始終係小店啦，又多人同時叫餐，所以出餐都比較慢。不過當個便當真係上到檯嘅時候幾驚喜，塊豬排好大塊，而同事食雞腿便當都勁大舊。除左雞排外仲有啲配菜，而且啲配菜唔同日子會轉，咁岩今日嗰啲全部都好岩我食，好開心竟然會有甜不辣。豬排超大塊，用左地瓜粉炸然後再滷，好入味，中意依種煮法多過就咁乾炸。我覺得個便當嘅飯量比較少，反而係多餸。所以基本上食完成個都已經好飽，不過如果真係唔夠食嘅話，都可以叫佢比多飯。而且食唔哂仲可以帶走架。

那個滷排骨便當

食物質素唔錯而且大大件，唔怪得咁多人排隊幫襯啦，一路食都見到出面有人排隊。覺得幾好味，值得黎試下，我下次一定會再黎。不過如果係想食嘅就真係要早啲黎排隊，如果唔係就要等第二輪。