一去到見到條長人龍真係嚇親
閒日早上都咁多人
足足排到轉角位
不過澳牛嘅光速真係唔係講笑
雖然有幾十人排隊
但唔駛10分鐘就已經可以安排入座
因為拎住個大袋
侍應哥哥好好人咁專登安排我坐牆邊有櫈放嘢
澳牛嘅環境係比較逼
但要坐得舒服嘅就唔會嚟澳牛啦
一坐低侍應姐姐就放低杯茶同落單
由於一早聽聞過澳牛嘅極速傳說
所以我都一早諗定食咩
蛋就跟咗隔離位先生叫太陽蛋
落完單轉頭就即刻嚟碗通粉
一食落口有驚喜
湯底比一般濃厚
通粉食落軟硬適中
轉頭就嚟太陽蛋多士烘底
略嫌偏生咗少少
不過我都明有啲茶餐廳嘅太陽蛋係偏生
用嚟夾多士還好
塊多士比一般厚
索埋啲蛋黃同牛油好好味
食食吓見到附近有人食炒蛋個樣好吸引
（之後search返先知原來佢炒蛋好出名）
食完蛋同多士侍應就即刻幫我收碟同落嘢飲
有啲人可能覺得咁做係趕客
但其實呢種效率正正係澳牛嘅特色
而且收走啲碟唔會阻住飲品到都係一種貼心表現
好難得仲有茶餐廳有熱唂咕飲
真係夠晒熱
驚阻住佢哋所以我都盡量吹凍飲快啲
侍應哥哥見到反而叫我慢慢唔駛急
好多人話澳牛服務態度差
但我見幾位侍應都好體貼
現場不斷有BB喊佢哋一啲唔耐煩都無
面對外國遊客又會耐心解釋
佢哋講嘢可能大聲啲
做嘢又快又急
但佢哋做嘅嘢充滿住人性化
喺呢度我深深體會到香港人外冷內熱嘅寫照
食完埋單走人前後20分鐘都無
名不虛傳嘅光速
澳牛嘅快完全切合香港呢個咁講求效率嘅地方
佢自有一套嘅規矩有人可能覺得無服務質素
但理解過後反而覺得呢個就係佢嘅魅力
下次要試吓佢嘅炒蛋～
