特色糖水小食 (Closed)

呢間糖水店一直都唔少負評，有朋友食過都擰頭，話態度麻麻。出奇地，我去親佢地態度都唔錯。難得今晚唔洗等位，就去食個小宵夜，縱觀馬鞍山，比較出名的糖水店都係甜館梨巴個類，宵夜要食粉麵得一兩間茶餐廳同麥記，自己鍾意食D飽肚的食物，所以呢間比較適合我。因為就我所知好似冇一間好似特色糖水小食咁有牛肋骨同雞軟骨食，牛肋骨簡直一絕，食完會覺得，其實牛摩個類或者西餐廳D牛肉餐都比唔上一碟牛肋骨，一人一舊食食下，閒話家常，凌晨一點左右，最後一台就係我地，簡直係那裡只得你共我。雞軟骨細細粒又係好味，傷心酸辣粉其實都有雞軟骨，但係落粉太多，炸到好大舊，但大部份都係炸出黎的粉而唔係肉，所以相比之下呢度係比較足料的。以往呢我就食開雪花冰，因為鍾意食凍野，但係呢幾日天氣有少少凍，所以決定冒險叫花生湯圓糖水。冇叫錯，冇得彈，天氣凍，湯圓的薑汁好暖胃，又甜甜地，好好味，花生湯圓雖然5粒，但係連埋牛肋骨雞軟骨一齊就飽，下次可以繼續呢個叫法。其實，冇咩人去負評會更加好，咁去到唔洗等位等咁耐，響糖水舖睇埋套電視劇傾多兩句就番屋企訓，開心!