好耐無打邊爐啦!今日約埋個朋友去旺角呢個有懷舊氣息既火水爐打邊爐~餐廳都幾full架,walkin要等到9點先有得食,所以想食最好都係bk定位!8點幾上到去都爆曬!一去到餐廳落去已經被懷舊風既裝修同佈置吸引,打卡一流啊! 呢間係任食 火鍋,限時1.5hr 我地簡左呢個$298套餐 澳洲雪花和火花膠火鍋放題套餐 依家晚市仲有85折添!折左$253一位 都幾抵食啊! 坐低之後先揀湯底,呢到最出名係花膠湯,緊係叫返個濃厚花膠雞湯煲啦!之後會有醬汁配款可以加自己鐘意既野,有芫茜,蔥,生薑,炸蒜,生蒜,辣椒同花生醬! 叫完之後先黎左個餐前小食:炸燒賣同炸魚蛋,好快清曬 因為超餓😂 之後就可以劃想食咩款啦,肉類方面有澳洲雪花肥牛、安格斯牛頸脊、美國頂級肥牛、黑毛豬肉片,每樣先黎兩碟先! 火鍋黎左之後一打開驚為天人!超多花膠同雞啊,個雞湯都超香,流曬口水,花膠充滿骨膠原,即刻整兩塊食先!之後食雞件,都好滑!正~入面仲有好多白蘿蔔,煮到淋曬,好正! 跟住食得差唔多就可以加其他配料啦!幾款肉睇落都好新鮮,肥瘦岩岩好,我最鐘意雪花肥牛,好新鮮,肉又淋好食!另外黑毛豬肉片都好鮮味!朋友就鐘意安格斯牛頸脊多d,話好香牛味喎!食完肉就開始食d蔬菜啦,選擇都好多,有各種新鮮菜選擇,我叫左西洋菜,生菜油麥菜同粟米,黎到個感覺都好新鮮同乾淨👍🏻👍🏻
嚮鈴都好脆,浸落湯上黎好好食~仲有牛柏葉同豬皮豬血同黑木耳,索曬個雞湯超好食! 飲品方面有汽水任飲既,可樂雪碧忌廉都有齊,朋友就叫多左杯hoegaarden飲,話打邊爐一定要有啤酒啊!
最後已經食到大滿足,但都要叫埋個出前一丁 索曬d湯底食埋先係真正既完結啊!
餐廳仲會播足球賽,岩曬一班朋友邊食邊睇波啊!