年頭小編去咗轉意大利🇮🇹，成程食咗好多餐意大利粉，同係香港食過嘅意粉簡直係天壤之別，正宗嘅意粉大多都只係用簡單幾樣芝士、蕃茄、酒、或香草去調個醬汁，但每樣食材嘅原味都非常突出，完全唔會覺得寡😱
而最近係跑馬地食嘅呢一間小酒館，佢地嘅手工意粉令到小編覺得有翻咗意大利嘅感覺🫨單睇menu見到全部主食都係意粉已經覺得咁專做意粉應該唔惹小，結果完全冇失望，要推介俾大家😎
今次就試咗兩款意粉，Homemade Pappardelle Bolognese($168)同Homemade Tagliatelle Amatriciana($158)，兩款手工意粉都係好al dente就不用多講，最欣賞嘅係醬汁嘅濃度同層次🥹肉醬寬帶麵混合咗豬肉同牛肉，深沉色澤嘅醬汁飽含咗成熟蕃茄嘅鮮味、紅酒嘅醇香、以及香草味道，絕對唔簡單😣蕃茄豬面頰扁意粉仲更加合小編嘅口味，酸甜嘅鮮茄配奶香十足嘅Pecorino Cheese，平衡得非常好，係令人上癮嘅味道🤤
另外亦都試咗餐廳嘅精選意大利風乾火腿($128)，三款經典嘅火腿Parma Ham, Coppa Ham 同Mortadella配上醃橄欖，如果有埋芝士或者蜜瓜做搭配就更好🫡而最後點埋個自家製嘅巴斯克蛋糕($108)，中間心都焗得熟透，所以縱然焦糖味都幾香，但都好有飽膩感🙂↕️
臨離開前同餐廳負責人傾偈得知呢一間小酒館同隔離嘅西餐廳Locanda係用緊同一個廚房，而Locanda係獲得多次米芝蓮推介嘅星級餐廳，呢間小酒館就比咗個機會可以以平民價去品嚐大廚嘅手藝，非常推薦大家下個約會黎試一試💕
