行到邊食到邊,我哋黃昏就去咗太子附近食越南野。 雖然未食過，但一入嚟呢間餐廳，對佢就已經有啲信心，因為餐廳正中間張枱就已經有好多foodpanda嘅外賣order喺度等緊。
睇到餐牌真係完全O嘴，估唔到響太子算旺區嘅地方居然咁抵食
咁我哋當然會點返越南最出名嘅火車頭牛肉可啦，加上我哋三個人就再嗌多一份法式咖喱牛肋油香飯。
嗰個牛河係非常大份，有生熟牛肉丶牛丸同埋扎肉，而且仲有一啲芽菜、青檸仔同九層塔香葉另上，餐廳小小但一啲都唔馬虎。
而呢個特色咖喱牛肋油飯個味道非常特別，同平時一般食嘅咖喱味道好唔同，但又有一種似曾相識嘅感覺。
我哋仲另外嗌咗越南春卷，油菜同埋意大利黑醋蒜香牛油雞翼。飲品方面我哋叫咗鹹檸七，可能因為疫情關係，佢哋好似珍珠奶茶咁係以密封式去上，感覺係衛生同埋令人放心好多👍🏻
由於實在太抵食啦，所以我哋最後都再嗌多一個軟殼蟹青木瓜沙律，咁樣就算我哋食多咗油炸嘢，感覺上多番少少蔬菜都好似健康啲😈🐽
三個人嗌咁多嘢食都係$300有找，相信我會返轉頭嘅機會應該好大！😋
