伊賀日本燒肉料理 (Closed)

真心唔明點解可以有二百幾個好評。是我要求高？還是大多數人容易滿足或者要求低？啲食評究竟有幾可信，真係幾迷惘。其實幾句已經講完，食物碎濕濕，食味普通/偏差，通風不太理想(進入餐廳後咳咗一輪)，一定唔會再去。大多數肉類都是碎濕濕的，一口牛只有約一釐米丁方，壺漬牛是極幼極碎的肉絲，放在網上燒不久就燒焦，不同種類/名堂的肉味道都差不多，食完都唔知食咗啲乜。天婦羅碎濕濕唔緊要，但加埋皮厚又無沾汁和蘿蔔蓉，真係唔掂。海鮮又係碎濕濕，帆立貝只有五毫子大小，蜆又係細細粒，龍利魚又係細細粒，蝦和青口大小正常，但蝦好乾，青口帶腥。$298加一都無包嘢飲，另加無酒精飲品$30一位任飲，有酒精就$50一位任飲，開頭話一叫就要全枱都叫，仲要叫同一樣嘅，即係唔飲酒都要收飲酒嘅價錢，講講吓又話四個人起碼要兩個收飲酒價錢，一時一樣，講明話只有一個人飲酒都唔得，結果唯有一個陪三個唔飲酒，呢種不站在顧客的角度著想的營商手法，完全杜絕回頭客。服務中規中矩，算快（可能因為只得幾枱客），但最不可接受就係久不久有人埋黎搖兩搖你的飲品罐，甚至唔搖照收。唯一可取就是用平板電腦落單較環保，不像其他放題浪費大量彩色印冊的紙張。