後尾上網睇返，食齋或者食素嘅定義可以好廣闊，唔同嘅宗教都有唔同嘅定義；食奶製品；食海鮮；唔食五辛；唔用/食動物生產嘅製品，不過共同嘅都係唔食肉。其實仲可以細分落去，不過都跟返自己嗰套啦，最緊要心中有佛。
今日黎雅・悠蔬食尖沙咀分店，環境同銅鑼灣店差唔多，以白色紫色為主調，睇落都係幾優雅。另外人多仲可以包房，如果一家大細黎都幾好，自成一枱，又唔怕畀人話嘈。
坐底嗌兩杯嘢先，都係冬日限定，呢排都係凍凍地，梗係飲熱嘢啦。最近個個都批鬥啲餐廳亂咁出紫薯產品，於是我就點杯紫薯牛乳特飲，一試究竟。
1
紫薯牛乳特飲 (熱) $38
淡紫色，聞落其實一般，但飲落幾好飲，只帶少少甜，無落糖漿之類，成個感覺好天然。新鮮即榨紫薯配牛奶，口感線線地，似飲餐湯。
1
滋潤蘋果雪梨海底椰 (熱) $38
相信好多人飲過媽媽煲嘅蘋果雪梨糖水，無試過嘅朋友可以係呢度試下啦！絕對唔會差過家中愛心嘅湯水，一入口就已經滋潤緊口唇。味道好甜，一黎係熱飲，二黎相信都足料嘅，而唔係加好多糖。另外加咗海底椰，如果想滋陰潤肺、除燥清熱同止咳就要試下喇。
1
黑松露薯蓉焗大啡菇 (3件) $148
身為招牌菜就梗係要食啦，尤其係黑松露配至愛嘅大啡菇，要趁熱食，唔係芝士會變硬，少量黑松露點綴，大啡菇多汁飽滿，中間釀咗薯蓉，食完個胃絕對有反應，份量嘅多少可以同店員落單時溝通，就唔怕食到濟。
1
椰香鮮茄冬蔭功意大利飯配香酥蒟蒻 $128
意料之外嘅一道菜，無諗到冬蔭公配意大利飯可以咁好食，飯粒煮得啱啱好，食落有咬口，個冬蔭公汁唔會好似飲湯咁咸，而上面嘅炸蒟蒻一咬仲以為係魷魚圈，出奇地好食，椰香味就唔算明顯，可能重少少會啱我啲。
1
黑椒猴頭菇扒配意式意薯條(有蛋) $138
呢款係尖沙咀分店限定菜式，係屋企好少會以猴頭菇做主食，見呢有就試下啦。黑椒汁比想像中甜，比較杰身，亦都無平時嗰種刺鼻感覺，由於猴頭菇味淡甘，配上呢個汁更好食，口感結實肉厚，大約有四塊，絕對夠飽。其餘淡味嘅蔬菜配黑淑汁食都幾好，黃色翠玉瓜特別甜好食。
1
最後甜品有紅棗圓椰汁糕餅(4件) $38 同紅棗乳酪蛋糕(2件) $38
前者味少甜，煙煙韌韌，椰汁夠香，紅棗味反而唔明顯。乳酪蛋糕就比較吸引，上面淋咗啲柚子汁，酸酸甜甜，蛋糕唔算厚實，都幾好。餐廳仲有好多新潮菜式，食落你總會諗面前嗰碟係咪菜黎 ，下次再黎試新嘢 。
呢個世代人人都會話要食得健康，素食絕對係首選，對自己對世界都好健康，唔係話食肉唔好，只係所有事都要有個平衡，古時智者一早都話要取中庸之道，我諗對身體尤其係，物極必反，所以間中要食麥當當(誤)。
