雲南千味

食過幾次唔同味既過橋米線&小食，今次就黎個心郁郁既小菜團了～五個人、七點、八碟小菜（！！！）五百零蚊埋單～以下好味度只係我個人評分，不代表全檯立場～

酸菜水煮豆花魚好味度★★★★☆
同四川既水煮魚好唔同，唔紅，唔麻，唔點辣，酸酸辣辣，幾開胃，湯底當然係鮮美了（甜就食唔出了，始終有陣辣味蓋\左）。魚用魚腩，個味道有D似鯇魚，但肉質比較結實，係酸菜辣椒既襯托下非常有魚既鮮味，不過無去到骨，怕骨既啖啖肉人士可能會有D驚。除此之外仲有好有豆腐香味既豆腐XD 幾滑，不過又未去到豆腐花既滑度。底下仲墊左好似粉絲又似米線既QQ條狀物，師傅有介紹過，不過飲飽
食醉返到黎就唔記得左了...

老實講雖然呢味菜好好味，但我比較鍾情四川風味既水煮魚。不過同桌愛美號非常鍾愛，以潛藏既非凡實力包左底，贏得全檯掌聲鼓勵。食晒之後師傅先同我地講，呢個窩係十人份的...

原味鮮雞汽鍋（大）好味度★★★★★
本來係有田七既，不過團友中有人唔受得，於是改做無味汽鍋雞，呀唔係，係原味汽鍋雞至真XD

內容就係一鍋雞湯浸住一盆雞件（最多落多兩塊薑片），無雲耳無重手調味料，全部都以雞既味道決一勝負，雞湯雞油既香甜，雞既鮮嫩肉味，我覺得非常讚，even食左D比較辣既菜都食得出個香甜鮮=)~ 最後愛美號包晒雞底，某死辮子包晒湯底，分工合作天衣無縫，梗！

臭豆腐好味度★★★1/2☆
蒸臭豆腐，有食過台菜既蒸臭豆腐第一樣諗起既一定係陣臭味。不過好彩呢味都唔算臭，兼有大量紅椒麻椒鋪面，食落似腐乳既味道（不過無咁鹹）師傅好好心分左臭D同埋無咁臭既豆腐兩種（我諗係指果陣味既濃郁度），大家既結論都係，臭D好味D。仲有就係，襯熱食。

滇香金瓜好味度★★★★☆
南瓜粒上堆上一堆類似臘腸既物體，兩樣野齋食的話臘腸普通，南瓜香甜，但若南瓜同臘腸撈埋一齊食後，竟然意外地好好食！凍左都好食。愛美號又包左南瓜底了！

金腿娃娃菜好味度★★★1/2☆
就係娃娃菜上面鋪雲腿，似火腿津白feel，但D火腿邪惡地半肥瘦——上半係透明如冬瓜的爽口肥肉，下半是有點過熟的鹹肉，加埋娃娃菜一齊食味感風味佳，只食其中一樣既話都無咁好味。不過我都係鍾意過橋米線入面岩岩浸起果塊軟滑火腿。

雲龍雪山白參好味度★★★★☆
所謂雪山白參據說就係雪山上採摘既細小菌類，稀少而且要慢慢用人手除去上面污泥，極考工夫云云。佢\既做法就係將白參混蛋液煎成蛋餅，蛋香一流，白參爽颯颯，不過要襯熱食，唔係就少左陣蛋香了。

山珍龍鬚瓜好味度★★★1/2☆
龍鬚瓜據說係一種蕨類植物，能吸收膽固醇，非常健康，雖然我地已經食到慢晒落黎，但師傅會走埋黎建議我地食晒佢\。夾埋蒜塊、原條辣椒、雲腿絲同埋其他不知名植物一齊炒，非常惹味，可以送飯用～

大理王子炒耳塊好味度★★★★☆
大理王子係咩樣就睇唔出了，不過耳塊原來係年糕類物體，同上次食既限量燒耳塊又有唔同感受（燒耳塊係以搓成薄片既耳塊包住一種鹹鹹辣辣既餡料類似北京填鴨咁食法）又係要混埋D肉碎酸菜一齊食，即使已經係最後一碟菜好飽都竟然食得晒九半成！

酸角冰沙好味度★★★1/2☆
味道似酸梅湯冰沙。最適合飽到咁款時飲用，兼且好多藥用功\效，即管一試～不過我都係比較鍾意上次個皂米角糖水果種清涼冰甜既感受，可惜比較飽肚...

總結：
我食過既中菜入面，好多都好味，但講到能突出到材料原味既食肆，就只有寧波旅港同鄉會，同埋呢一間，雖然呢處無寧波既細工同賣相。不過一間小店黎講，我已經非常滿意～

附註：
間舖好有性格，每日材料賣晒就無果款菜，務求材料新鮮，就好似佢\極出色既過橋米線夜D去都未必食到。如果要汽鍋雞更加記得要訂，唔係日日都做既～
如果想食小菜就要好似私房菜咁訂法了~