食物：
食物方面有好多選擇，有熟食又有生嘅食物，可以滿足喜愛即食人士同埋慢慢燒過程嘅人士。種類多之餘，又新鮮。
海鮮方面，蠔夠晒大隻，帶子又係大大粒啖啖肉，多春魚同埋其他魚都夠新鮮，唔會燒一燒就黐晒底，蝦都好新鮮，肉質夠晒彈牙。仲要有其他地方好難搵到嘅咖哩魷魚。
肉嘅種類多到有啲眼花繚亂，淨係牛肉都分牛仔肉、牛肋肉、牛柳等。豬肉又分咩豬頸肉、豬腩肉、五花腩、豬扒等。
麵食冷烏冬都係一個唔錯嘅選擇，上枱時仲有冰係入面，名符其實係冷烏冬。
飲品方面就差少少，雖然選擇都唔少，但就補充唔切，食到後期可能無凍飲品了。
甜品就行配給制度，一個party得一張紙仔，每人一條雪條，如果以一間任食韓燒嚟講真係小家咗少少。
服務：
Order咗嘅食物上得都算快，係可能人手唔係幾夠，有時要求侍應拎水或處理其他嘢就可能要叫多幾次。
環境：
現場環境所見，食客比較多，但空間有限，所以有時難免同隔離枱出現背靠背嘅情況，同埋會比較嘈吵，喜歡寧靜用餐嘅朋友會比較難適應如斯用膳環境。環境衞生乾淨程度理想，可以給予食客信心去享用食物。仲奉上一塊蘿白俾大家可以自行清潔爐具之用。
