Mr. Crab by The Captain's House (Closed)

呢間餐廳之前都已經聽過好多人介紹，朋友直程將佢列為「必去餐廳之一」，所以今次就同佢黎，叫咗一份二人餐。我地呢個Set for 2裡面有一份小食，小食方面我就叫咗水牛城雞翼，微微嘅辣，配上炸得非常香口嘅雞翼，一路食嘅時候，雞油一路溢出黎，是非常好的體驗。再之後就嚟咗一份餐湯，有龍蝦湯同埋蘑菇湯，龍蝦湯有非常香嘅炒蝦殼嘅味道；蘑菇湯汁非常濃郁，充滿非常濃厚的忌廉和蘑菇碎。再之後嚟咗一份威靈頓三文魚，呢一個主菜嘅特別之處在於，佢用咗威靈頓牛柳嘅煮法，但係就唔係用牛肉，以三文魚代替，酥皮同埋三文魚中間有一層好厚嘅香草牛油，提升左整個三文魚嘅油份，亦令到焗三文魚變得非常香口。再之後我哋叫咗一份冬陰功Risotto，我會形容呢個絕對係呢一餐飯特色之一，因為平時冬陰功都係好傳統嘅整法，會做湯，但係佢將湯同埋意大利米煮成為呢一款飯，色落去嘅時候會有微酸，微辣嘅味道，加上海鮮非常新鮮，所以很不錯。餐飲方便我哋叫咗一杯白酒，一杯紅酒，甜度足夠，非常不錯。