我同我男朋友諗住見佢新開張冇耐就試下好唔好味啦
入到去,門面幾靚,但一個食客都冇
我地諗住當時都係1點左右未開始多人所以冇理就坐低嗌野食
個度啲職員全部都係香港人,我以為應該好似普通泰菜館咁有泰國人係入面做野添~
我地嗌左2個set lunch,
1個係青咖哩雞肉飯+龍眼茶
1個係泰式金邊粉+青檸梳打
我地再加多個$18小食,泰式鳳爪沙律
青咖哩雞肉飯
張相影個時我男朋友已經食左幾啖
未食已經見到啲青咖哩汁好稀,賣相又唔靚
食得去更加淡而無味,好似白烚咁!
直頭係非常差!一啲都唔好食
:)泰式金邊粉
金邊粉都算係幾好食啦,不過炒得好濕同埋唔夠鑊氣
但味道幾好,都算足料,啲蝦食落都新鮮同彈牙
泰式鳳爪沙律
好辣,但味道麻麻
加上得好少,唔係好抵食
龍眼茶&青檸梳打
左邊個杯龍眼茶除左淨係得好甜既糖漿既味道外,係唔會飲得出有茶同龍眼味-.-
好想而知係幾咁甜同唔好飲
而青檸梳打,我見到個杯野飲到時都呆左呆
塊青檸細到想篤多幾下都難,成杯都好淡味,唔好飲
總括而言,價錢唔係平但唔貴,同九龍城個啲泰國茶價錢差不多
但味道就真係強差人意!
食過一次後我同我男友都好肯定唔會再黎第二次,真係一啲都唔好食,直頭用差黎形容
衰啲都要講呢句,呼籲大家可以唔洗去呢間泰皇屋食~
