對上一次寫食評已經要數到新冠前, 呢段時間好少外出食野, 亦無心情寫食評
係最近放寬左先多返出街食飯
講返呢間舖頭, 響街角位置, 感覺有D老舊, 衛生放面麻麻
早前行過見餐牌好多款式, 所以中午入去試下
叫左一個蝦仁香菇大餛飩, 熱奶茶
等左十分鐘到煮好
湯底: 好普通, 好清淡, 我唔知京式係咪都咁清, 但飲唔出有乜特別
餛飩皮: 質量唔錯既, 唔會一夾就碎, 好多差既餛飩皮好容易浸到爛溶溶, 最少佢就無呢個情況
蝦仁: 同蝦米差不多大小, 食落口都爽既, 但跟我地傳統大蝦雲吞比就細左D, 我諗剝殼既工錢仲貴過蝦成本
香菇: 喂大佬呀, 完全無味道!
鮮肉: 肉質係新鮮既, 但選既肉太瘦, 入口咬落去無肉汁香味, 簡單講就係削
奶茶: 唔得, 大家樂即沖奶茶咁既水平
整體其實評OK都好掹車邊, 所謂大餛飩既SIZE其實同食開既雲吞差不多, 一客十隻唔係好夠飽
十隻加餐茶51, 價錢上亦無優勢, 如果係想食清清地既可以既, 只係同我預期有落差
