千島香芒牛油果雞肉pizza-勁足料，熱辣辣，放喺枱面已經聞到好香， 薄餅皮厚薄適中，薄餅邊夠脆，牛油果新鮮，芒果同牛油果經過焗之後都仲係好有口感，牛油果好夾，勁多芝士，仲配有車厘茄同雞肉同洋蔥碎，芒果嘅果味中和咗平時食薄餅嘅油膩感。
慢煮BBQ醬美國豬肋骨- 配有番薯條，普羅旺斯燉菜（有南瓜，翠玉瓜，茄子），燉菜夠淋，好夠味。番薯條唔油膩，夠脆，配埋檸檬蛋黃醬，整體好夾。主菜豬肋骨唔會靭，帶有少少黑椒味，bbq個醬唔會太濃，同埋都好多肉，骨嘅左右都脆口，但又唔燶。
是拉差醬雞翼- 好大隻，炸粉同雞皮都唔厚，個皮好脆，好多肉，肉嫩多汁，好香牛油味，似越南雞翼嘅口感，配埋是拉差醬食又有另一番風味！
黑森林蛋糕- 蛋糕夠鬆化，朱古力唔會太甜，每層都有啲朱古力醬，好好食。
蘋果肉桂香檸冰茶 - 好重蘋果味，after taste就感受到肉桂味，有一條玉桂放喺面，唔算好甜，味道好特別，清新之餘有輕輕的甜味！ 唔會好多冰，但好夠凍！真冰茶！
野食種類都多，同埋好食，最緊要坐得舒服，有氣氛得黎價錢大眾化。
1
