兩間舖雖然係分店，但賣嘅嘢都不盡相同，呢度仲有一幅好靚嘅黑板畫，介紹吓仲有啲咩鎮店之寶。
一坐低店員先俾杯熱茶，呢杯並唔係普通嘅中國茶，而係每日新鮮煲嘅羅漢果菊花茶，非常滋陰又潤喉。
招牌癡花膠雞濃湯米線當然係必要之選，雞湯非常濃味，啖啖真材實料。
入面仲有一件件嘅切雞同埋花膠，材料豐富，雞件煮得啱啱好，肉質保持嫩滑唔鞋口，呢個價錢真係冇得輸。
原本諗住叫藥膳，不過店員話最近多咗人叫椰子雞米線，都啱嘅，一來已經試過藥膳，二來天氣咁熱唔使咁補住，就一於揀個鮮甜啲嘅椰子雞。
呢個椰子雞雖然冇花膠，但取而代之嘅就有雲耳、紅棗、椰子，一樣咁滋補。
呢度嘅小食好多都只係$28，所以我都點咗幾款。呢個金磚豆腐係即叫即整，上枱嘅時候熱辣辣，而且真係做到外脆內嫩滑嘅效果，簡單灑上少少味粉同芝麻，就已經非常可口。
平時椒鹽菜式就成日食，但就真係未試過椒鹽粟米，起初仲驚又鹹又甜有少少怪，但估唔到食起嚟味道又幾夾，而且粟米切成小件，食起上嚟更方便。
雖然呢度主打都係雞湯，不過見呢度同時都有魚湯，所以就叫返個鮮味魚湯時蔬，蔬菜主要都係白菜，另外再有木耳絲，浸過魚湯嘅蔬菜特別好味。
最近真係愛上呢類雞湯窩麵，真材實料冇味精嘅花膠雞湯，一大鍋有雞有花膠連埋麵都只係買$68，真係仲抵過去酒樓飲個燉湯！
