無錯!!!!!我又嚟咖啡弄潮聖啦
大大話話都嚟過4,5次,每一次嚟都係人流不盡,座無虛席,想入去食認真要俾小小耐性。自問一向都鍾意去cafe食嘢,無論名牌與否,最重要嘅就係食物嘅味道同埋坐得舒服,咁樣就可以令人完全放鬆,喺心情愉快嘅環境底下品嚐美食,而每一次嚟到咖啡弄,我都可以得到呢種感覺,慢慢享受
今次大約下午三點半嚟到,人龍唔算誇張,所以大致上等咗十五分鐘左右就可以入去喇。每一次嚟,都一樣有選擇困難症咁,唔知食邊樣好,因為樣樣都好吸引,無論係咸點抑或甜點都想叫哂,但明知道......這是不可能的任務🤣由其是係得兩個人嚟👉🏻👈🏻
好啦~今日我就試下佢哋嘅
嫩煎香草雞肉巧巴達三明治, 同埋叫咗杯提拉米蘇咖啡。為食嘅阿肥今日試總匯三明治, 冰鮮果茶再加一個甜品鮮果冰淇淋百匯。
點餐時職員都事先講明我個三明治要等二十分鐘,為咗食,我唔介意等一陣嘅。首先嚟到嘅係阿肥份總匯三明治,食物擺放得美美整齊的,上面仲附有惹味脆口嘅墨西哥脆片,我拎下又一塊,拎下又一塊...
眼見三文治裡面有足料嘅蕃茄+青瓜+火腿+雞蛋,仲有煎到脆哂邊嘅雞肉塊,麵包亦烘過底,見到都心動~另外佢仲配咗一球雞蛋沙律,亦係我同阿肥嘅至愛。阿肥話水果茶係佢每次嚟嘅必點!!!係佢大愛嘅飲品,佢除咗話「好味」之外就冇其他comment喇😂呢度嘅水果茶係一jar咁的,另奉上小杯,而裡面有一塊結有一片檸檬嘅冰,相信用嚟中和味道,十分細緻。跟住嚟嘅就係我杯提拉米蘇咖啡,賣相已經相當吸引,面頭有一層厚厚嘅泡沫,灑滿咗高純度嘅朱古力粉。職員貼心提示你可以直接飲用,無需攪拌,小匙羹就係俾你用嚟"不"起啲泡泡食,令人超治癒
咖啡味道香濃而滑,苦澀醒神,唔想破壞味道真係要趁熱飲用喇。期待以久我份嫩煎香草雞肉巧巴達三明治終於上場喇,一樣賣相精美,包入面嘅涵料多到想爆出嚟咁,一條長麵包切開咗三份,裡面嘅雞肉已經被分碎,滿滿嘅香草味而肉質嬌嫩,令人食指大動,裡面另有蕃茄片同生菜可以中和番比較重口味嘅雞肉,令我一口又一口咁將成份食哂
阿肥已經趁我差唔多食完份三明治嘅時候示意職員可以上甜品喇,見佢預備都大慨要十至十五分鐘,鮮果冰淇淋百匯,顧名思義即係什果雪糕,生果好豐富,有鮮橙,火龍果,香蕉,蘋果,士多啤梨,菠蘿...而雪糕係雲呢拿+士多啤梨口味再加上小小牛奶汁,咁大份真係令人食到口都攰埋
兩個人坐得舒舒服服,一邊食嘢一邊閒聊,飽到咁埋單都只係三百多幾蚊,難怪咖啡弄會令人愈食愈愛
1
