我同朋友一齊order左兩個主食，再加兩杯童年回憶飲品，一齊分嚟食，啱晒放工後鬆一鬆又唔會太heavy。
呢道係我哋一致覺得全場MVP！鐵板一上枱就「滋滋」聲加熱氣撲面，龍蝦開邊鋪面，蝦肉厚身彈牙，蝦膏香到不得了，唔會腥，仲幾鮮。中間嘅挽肉幾好食，令整個菜式層次更豐富。另外再跟一個意粉，夾住龍蝦肉一齊食，真係有種豪華版嘅feel，估唔到咁match！
呢個焗飯就行另一個方向，成個焗飯香濃茄香味，唔會過酸。用料好足，入面有大蝦、魷魚、珍珠貝，啖啖都食到海鮮。飯粒偏向濕潤啲，但焗面做到微焦金黃，勁香脆，咬落有層次。整體好似港式焗飯融合少少西式做法，唔會太膩又好飽肚。
另外，都同朋友一齊order飲品，因為太口渴所飲左先而無影到相。見到餐牌有呢兩杯童年回憶，即刻叫齊。黑牛係可樂加雪糕，雪糕慢慢溶入可樂，甜中帶少少汽水嘅刺激感，飲落即刻返童年；白牛係忌廉梳打加雲呢拿雪糕，冇黑牛咁heavy，帶點清新奶香，同焗飯配起嚟超夾。
總結嚟講，「金龍」絕對唔係淨係靠裝修打卡，而係有心機做菜，每道菜都有啲新意思。無論係海鮮火候、口感處理，定係味道平衡都處理得唔錯。加上服務都幾有禮貌，價錢以地段同用料嚟講都算合理。下次會想試埋佢哋鐵板牛扒或者傳統扒餐！
