為配合大家，今次選擇了位於銅鑼灣渣甸中心八樓嘅分店。地方簡潔舒適，感覺不錯。
由於一心希望能夠挑戰其主打大紅鍋（據稱係店內最辣嘅湯底），是晚湯底當然係色澤紅亮，十分吸睛嘅「九宮格麻辣大紅鍋」啦。初時上枱大家面面相覷，大概覺得無乜麻辣湯底應有嘅辛辣嗆鼻嘅感覺，原來喺辣湯開始滾起嘅過程，蒸汽徐徐飄起之際，才開始體會到嗆，辣攻鼻嘅刺激感，是晚刺激嘅麻辣之旅正式“啟航”啦。
刺激食材一「大刀牛肝」：甚少喺香港食過牛肝，呢度嘅牛肝被切成薄片，食法係先將蛋黃同牛肝撈勻，再灼熟食，口感綿綿滑溜，作為開場也相當合適。
刺激食材二「稻田毛肚」：亦即係牛柏葉，係店方極力推介嘅食材之一，面積大而薄，爽脆又煙煙韌韌，加上麻辣味嘅配搭，刺激感倍增。
刺激食材三「鮮黃喉」：黃喉係豬嘅主動脈，單聽店方介紹可能會與血淋淋掛鉤，其實經過特別處理後，賣相顯然較想象更‘平易近人’，灼熱後食用，口感也依然爽脆，愈食愈過癮。
刺激食材四「手打四寶丸」：有墨魚、蝦、鯪魚、牛肉丸，每一款都勁有彈性，富有口感，一客四種不同味蕾享受，推介！
刺激食材五「曉宇嫩牛肉」：孝禹十味之一，又咁啱大家都係無牛不歡嘅神一般隊友，所以當然唔少得佢啦。經過特別醃製嘅薄切牛脂肪比例適中，鮮嫩多汁，與麻辣湯底非常之匹配。
刺激食材六「鮮菇拼」：留待最後先食嘅菇類，原來係刺激食材之首，何解？因為經過浸灼嘅菇類，吸收鍋底的麻與辣精華後，辣勁倍升，刺激到眼水在眼眶轉幾個圈之後，仍不自覺咁流…
刺激結論：「麻辣鍋底除咗麻辣味精彩，仲帶有絲絲溫和口感，相信與加了牛油有關；食材方面頗有心思，值得再次幫襯嘅重慶麻辣火鍋店。」
