今日同朋友經過呢間野川拉麵の深燒食堂，我朋友就話想試下呢間日式食堂。
餐廳裝飾有點像日本居酒屋混合現代風格，吧枱放住好多日本酒同其他酒料飲品，坐得有種好chill感覺
餐牌基本上什麼日式菜都應有儘有，壽司、燒肉、拉面等等。
而且同朋友黎開心分享有部分食物係可以有分享價抵食好多，海鮮種類多又吸引
首先我先叫左一碗極上牛肉拉面，牛肉份量好多，而且佢啲部位肥瘦相間岩岩好。
牛肉唔會煮得太熟保留左牛肉柔軟的口感，周邊的位置粉紅色，令人食指大動。
湯底使用日式豬骨湯底，奶白色非常濃郁，忍唔住一啖接一啖
我朋友叫左一份綠茶冷面，擺盤似正宗日式蕎麥面，有別豎一格的高級感。綠茶面都幾彈牙唔會痴埋一舊，有陣淡淡的綠茶香味，配埋佢個沾面汁清爽解膩。
叫左份M5澳州和牛，哇哇哇，咁大舊M5真係見到口水都流埋。
餐廳仲好細心幫我地切埋一口份量，啖啖肉好爽，牛肉個種油花係個口腔裡面留左好耐，肉質又柔軟，分享價令到牛扒實惠左，又正又實惠~~
可能我地食牛仲未夠喉，仲叫左碟穀飼牛仔骨，帶骨的牛肉都好好味，廚師調味都唔錯，牛仔骨都唔會太鞋口
終於輪到海鮮啦
，燒半殼蠔每隻45元，有辣有唔辣，蒜蓉辣同芝士黎一件，兩件蠔金黃色色澤好吸引，芝士都舖好厚，燒得岩岩好，有啲焦香焦香的。大大舊蠔肉真係分2啖先食曬﹐而且仲有啲肉汁係上面有啖新鮮
燒扇貝同蠔肉都一樣有3種口味選擇，都跟住叫左一樣口味的。扇貝啲肉都QQ地好彈牙，肉質都新鮮，而且價錢都唔貴可以值得一試
食海鮮點可以少得蜆肉呢? 每份焗蜆肉份量都好多，隻隻都浸滿左牛油蒜蓉湯汁，食到"雪雪"聲，真心正~
燒蝦一定走唔甩架啦，餐廳似係用啲比較貴的花蝦，蝦身比較大隻，又厚肉。岩岩上枱個下香味四溢，食落去係鮮甜既，配埋啲椒鹽令人回味無窮吖~~
因為食左比較多燒肉，所以都叫左凍飲解解渴。兩杯飲品朱古力oreo，oreo同朱古力配搭非常夾杯飲品唔會太甜，朱古力都捨得加所以味道好濃。食左咁多肉類飲完都幾解下膩。
總括而言，餐廳食物質素整體拍得住酒店放題的級數。而且同朋友一齊食既話，好多食物都有2人份的優惠價一齊分享抵好多，牛肉類料理都捨得放本用左比較好的牛肉，所以對呢間餐廳牛肉類食物有信心。燒物基本都係即叫即燒，唔會話預製放涼左影響口感的感覺。上菜速度都合理，食完一碟菜之後無耐第二碟會到。餐廳性質都幾合適多人聚餐，有機會下次一定帶埋棚朋友大吃大喝~
