門面比較日式，諗住應該會好食，切記係『諗住』⋯⋯
今日叫咗一個55蚊和風汁豬扒飯，再加多份28蚊嘅小食，名字叫吉列黃金雙丸，飯跟飲品就叫咗凍啡少甜，本來應該係83蚊⋯⋯
其實如果55蚊連凍飲肯定叫「價廉」，但「物美」就真係見仁見智⋯⋯
豬扒飯首先上枱，睇見大大塊炸豬扒，嗰賣相仲好似幾得咁⋯⋯
跟住上枱嘅就係呢碟雙丸，雙丸應該係豬肉丸同墨魚丸。
杯凍啡小甜，應該叫糖水！無啡味齋甜，係自己一時大意，有乜L理由係日式炸豬扒店～會有可能飲度杯正常嘅凍啡吖！
跟住就襯熱拿臨食件炸豬扒，嗰吉列皮同件肉都淋淋地，原本自己仲諗可能係關個汁事，再試個無汁到嘅扒位，依然係吉列皮淋⋯⋯
而扒底嘅椰菜絲食得出係新鮮嘅，
又再下一層嘅又係日本米飯，飯好味。
日式吉列豬扒都食過好幾次，真心係第一次咁難食，試諗吓一件豬扒唔爽口，個口感仲有少少梅，仲有兩件有條咬極都唔斷嘅筋，攪到要成件放入口呑，失望囉。
雙丸墨丸係黑色，豬肉丸係白色，除開原本以為收我七蚊一粒，口感就無乜，係黑色墨丸嘅顏色較為特別。
最後一提係呢間日式吉列餐廳，隔離兩邊無記錯都係茶仔，佢地居然夠膽收加一！
本人意見係吉列店為首嘅一定係豬扒，見到呢度推廣蝦同雞，希望會先攪好尐豬扒先，唔該！
又此店係價廉唯先，尤如大眾飯堂，加一攪到本人覺得好不倫不類囉，不如取消加一或者張加一夾埋落個餐點度得唔得呢！？
