🍜【主角一：煮干魚介豚肉拉麵 (期間限定)】 4.8/5
👉 湯底：一上枱，個鼻就已經俾個種濃郁嘅魚干香氣攻陷！湯色係深邃嘅琥珀色，飲一啖，係非常純粹嘅煮干（小魚乾）鮮味，層次好豐富，由初入口嘅鮮甜，到喉嚨回味嘅甘香，一氣呵成。最誇張係佢嘅濃稠度，用湯匙舀起再倒落去，真係見到湯身可以掛係碗邊，真材實料無得呃！
👉 豚肉：放棄咗常見嘅薄切叉燒，改用厚切慢煮豚肉，呢個決定非常正確！肉質極之鬆化，脂肪同瘦肉比例完美，入口真係有種融化感，而且佢個面燒過，帶微微焦香，同魚介湯底出奇地夾，完全無違和感。
👉 麵條：揀咗中太麵，口感煙韌，掛湯能力一流，每一条麵都索滿魚介精華，正！
🌶️【主角二：雞叉燒味玉辛辣雞白湯拉麵】 4.5/5
👉 湯底：雞白湯底本身已經非常醇厚，帶住膠質感，再加入自家製辣油，辣度溫和唔嗆喉，反而帶出咗湯底嘅深度，香而不燥，好適合鍾意惹味但又怕太刺激嘅朋友。
👉 雞叉燒：呢個係全場第二大驚喜！平時食開豚肉叉燒，估唔到雞叉燒可以做到咁嫩滑多汁！有輕輕炙燒過，迫出咗雞油嘅香氣，口感軟淋到差啲以為自己食緊和牛，真心推薦！
👉 味玉 (溏心蛋)：醃得入味，蛋黃呈完美嘅琥珀色流心狀態，一篤穿，蛋漿流出嚟撈埋辣湯一齊食，邪惡度爆錶！
🍗【小食雙雄：辛辣唐揚炸雞 + 辛口燒餃子】
👉 辛辣唐揚炸雞：外層炸粉超薄，咬落去「咔嚓」一聲，跟住係澎湃嘅肉汁湧出！醃料帶微辣，非常開胃，唔點任何醬汁已經非常好食。
👉 辛口燒餃子：餃子底煎得金黃香脆，好似食緊薯片咁脆！肉餡加入咗辣味噌，味道濃郁，點少少醋食可以平衡返油膩感，惹味之選。
🍾【飲品配搭】
· 波子汽水：童年回憶返晒嚟！冰凍清爽，波子「叮」一聲跌落樽底，即刻有種儀式感，完美中和拉麵嘅濃味。
· 清新富士蘋果酒：輕甜，氣泡感細緻，蘋果清香好突出，好啱女仔，同濃味拉麵形成絕妙對比。
回頭率 ：80%
