真香蛋卷

Open Now

Now Closed

雖然久唔久會去元朗，但一直都冇留意。直至最近先由朋友堆中得知呢間晌元朗大馬路旁邊小巷，有多年歷史嘅真香蛋卷。佈局就好似間細細嘅士多咁，門外擺放咗各式各樣嘅懷舊唐餅小食。當中以家鄉雞蛋卷最馳名，聽講係人手製作，去嗰日仲傳嚟陣陣烘烤蛋卷時發出嘅香氣。佢哋有分鐵盒裝同紙盒裝，鐵盒裝仲有大小之分，圖案同字體都充滿懷舊風味。我買咗盒家鄉雞蛋卷嚟食下。紙盒裝一盒八條，簡單咁用透明膠袋包住。佢哋嘅雞蛋卷主要用麵粉、雞蛋、油同糖製成，比較我之前晌其他地方食過嘅薄身，但都睇到捲咗大約五層左右。拎上手都算挺身，食起嚟脆卜卜兼有蛋香，只係食嗰陣嘅餅屑比較細碎。另外因為冇加牛油，味道上比其他地方嘅出品少一份酥香，但幾乎冇油份沾晌手中，感覺上就比較健康啲啲。呢種晌舖入面現製雞蛋卷嘅老店晌香港已經買少見少，佢哋賣嘅唐餅小食款式亦都幾齊全，晌而家嚟講已經幾難得。