稚內日式創作料理居酒屋 (Closed)

阿豬唔識飲酒就係人都知架啦！朋友相約酒巴街，話食餐飯都嚇左我一跳。估唔到係一間隱藏係酒巴街既日式居酒屋。入到去餐廳唔大，但菜式唔少，我地幾個又唔知食咩好。店員服務態度好好，會問一問我地，又提供意思推介菜式。最後阿豬一行三人另外叫左d壽司、燒赤蝦、燒豬仔脾、炒什菜、炒飯。蟹膏軍艦，推介！松葉蟹蟹膏十分Creamy，唔同一般蟹膏佢一d都唔腥，入口蟹膏香濃好突出。下次一定要再食芥辣八爪魚軍艦，調味唔錯。火炙左口魚邊黑松露壽司，口感好好，阿豬俾佢surprise到，推介！左口魚魚肉較結實，魚油足，師父將佢薄切做壽司，入口濃郁甘香好鮮味。香燒豬仔脾，醃得好入味，咸香為主，燒得有點乾，阿豬覺得淨係點少少醬可以令佢更加惹野，ok。燒赤蝦好大隻，用海鹽燒，蝦肉較實乾身，咬落有口感，唔錯。鰻魚炒飯賣相好靚，入面既鰻魚塊、珍珠米、日式醬油炒得好均勻，鰻魚粒都多，好香口，推介！蟹粉炒什菜 阿豬覺得叫什菜好特別，因為佢係指瓜類，翠玉瓜同茄子，蟹粉味濃，加上高湯勾茨，入口綿滑清甜，唔錯！阿豬覺得個配搭翠玉瓜爽口，茄子淋身，可以考慮用其他配搭，如加添幾種菇類。呢餐誠意服務，高質食品，值得再回味！