Fei Yeung

已經唔記得幾耐無食過正宗打冷，元朗嚟講選擇唔算太多，一般都會揀老店，貪其食開穩穩陣陣。呢間坐落“雞地“既小店，對我嚟講算新店，想試好耐一直未有機會，今日機會嚟喇，朋友叫到話想打冷，加上無敵天氣坐室外食一流。

基本菜色，味濃但不過咸，豬紅爽滑，韭菜無渣

1

一間打冷店既滷水雜錦唔得，係執得。但呢間既滷水雜錦，係值得推介的！只係120蚊，份量大，而且乜都齊，落手唔姑寒，味道啱啱好，送酒送飯空口食佳宜

$120

好老土都要講句：係以前既味道！ 真架，以前食到好食既炸蠔餅，就係有呢陣味！而且呢份餅，做到蠔肥、料多、酥脆、香口，無多餘既油份，放入口一刻真有幾分感動🥹

料多過米，蠔仔隻隻又肥又新鮮，完全無砂石無腥味，湯水有齊肉碎、蔥花、香芹、冬菜，混合出呢種傳統原型既美味!

已經好耐無遇過會用炸雞腳做呢味菜，花生煮得入味而保持咬口

以後此店將會係本人元朗打冷首選，已經諗好再嚟要試乜：椒鹽九肚魚、涼拌魚皮、涼瓜黃豆排骨湯、春菜腩肉……哎呀，成個menu都想試晒咁滯，即係又要試多幾次😂 仲要朋友請食飯，理應點都抵咗，點知一問埋單價錢，3個人先食咗3百幾，嘩，初時仲以為計錯價錢🤑 好，下次醒目喇，約咗幾點食，就早30分鐘拎飛排隊！😄