冇諗過第一次寫食評就出師不利，編輯話食評只准講D嘢好唔好食，而唔係講服務質素，所以未獲審批。我覺得呢間嘢都算係用服務質素影響我嘅味覺。好啦，內容就唔改，不過篇嘢唔係食評，今次得啦啩！
本人係現崇山居民，間嘢啱啱開業嘅時候食過兩次，然後就將佢放係永不錄用名單。因為侍應騎呢，嘢又難食。不過今日阿媽同細佬話畀多次機會佢，點知成個過程我竟然好失禮咁扯咗兩次火，而家仲寫埋人生第一篇食評。
係咁嘅，個女侍應啱啱上工，我哋問佢餐牌上嘅澳門X山(我唔記得X係咩字)即係咩嘢汁，佢以為我哋要落單，搞到我哋要解釋：「只係想知澳門X山即係乜嘢？」佢即刻去廚房問，我聽到廚房答佢：「吉列豬扒飯或者意粉」，佢真係就咁覆述番畀我聽，我火都嚟埋，提高聲調：「我係問……」阿媽即刻勸我唔好再問，我先至壓低聲線：「澳門X山即係咩呀？」
落完單，老闆娘問佢我哋食咩，我哋估佢可能淨係聽完之後就咁講俾廚房聽，冇寫低。然後佢又逐樣問番我哋嗌咗乜。
餐湯，凍嘅。跟住我個焗肉醬意粉嚟到，一睇，我又激氣，但唔敢大聲：「我講咗幾多次，肉醬意粉要走芝士呀？」(我同媽真係講咗幾次)細佬即刻制止我：「你唔驚佢哋加料咩？」侍應收番，廚房即刻塞咗個冇芝士喺面嘅意粉畀佢。個意粉好明顯冇焗過，暖暖地，都唔熱，今次唔敢再出聲。
公平D講，食物真係進步咗，起碼冇咁難食。不過好替老闆擔心，咁做生意點得呢？
我會收斂吓D脾氣㗎！
The above review is the personal opinion of a user which does not represent OpenRice's point of view.
1
Dining Method
Dine In
