距離牛頭角地鐵站5分鐘路程，就搵到一間食法國嘢嘅西餐廳。一入到去，已經超級鍾意呢間餐廳。
餐廳環境寬敞，好難得喺香港見到一間枱同枱之間嘅距離咁大嘅餐廳。
而且佈置都好精緻，飾物擺設優雅兒簡潔。柔和嘅暖色燈光，營造出浪漫嘅氣氛。
而且餐廳嘅服務都好周到，侍應得閒會幫你添水，而且好多細節位都好細心。
而食物方面都十分之高質😍所有野都值得實名推介
👅法式紅酒燉澳洲牛臉頰肉 ($208) ❣️
雖然呢個菜式偏貴，但真係絕對值回票價。完全冇後悔食😍本身點佢係因為見到佢係廚師推介，而且牛臉頰肉好似好特別咁。一食真係驚為天人，原來牛臉頰肉真係寶黎。肉質極鬆軟嫩滑，入口即溶，有少少似煲湯煲咗好耐煲到淋晒嘅肉。菜式設計亦都十分之有心思，紅酒同牛肉本身就係絕配，加上底下嘅薯蓉同蕃茄，每一樣嘢都完全無違和。真心大推👍🏻
👅蕃茄芝士意大利雲吞 ($128) 👍🏻👍🏻
點呢道菜都係私心嚟嘅，因為之前喺西班牙住嘅時候，都試過喺supermarket買成包整好咗嘅雲吞返屋企煮。但然後我發覺，要你其他人係整得咁好味😂，同自己煮完全唔係同一個層次。西式嘅雲吞同中式嘅有啲唔同，四四方方嘅形狀，扁平嘅餡料，極多嘅肉醬配料。食落其實有少少似食肉醬意粉，不過依家係肉醬雲吞咁解
👅法國橙酒班戟 ($68) 👍🏻👍🏻
呢款係聽個名已經覺得好有特色嘅甜品。pancake味道好似係一塊好薄嘅熱香餅，然後浸住好甜嘅芒果汁，配上切成絲狀嘅橙皮。唔係太食到有酒味，而且芒果汁都幾甜下。所以我會撈塊pancake上嚟過走啲汁然後食，會食到好香好濃郁嘅蛋味。但食得甜嘅人，可以將汁均勻地搽上pancake上面一齊食，各有所愛😋
