麵道 (Closed)

有朋友搬咗去石門站附近，所以今日就去咗佢屋企，順便簡單食個拉麵，佢就帶咗我嚟呢間石門站C出口一出就見到嘅麵道。店舖唔算好大，感覺好似去咗日本嘅小型拉麵店，好有親切感。餐牌製作都好精美。呢排鍾意食黑松露，所以就二話不說揀咗呢個黑松露蜆貝醬油湯。湯底睇落清清地，但一飲就有好濃烈嘅黑松露香味，叉燒有兩款，分別係以雞肉同豚肉製成，同時仲會附上蜆肉、玉子同火箭菜，我覺得拉麵跟火箭菜呢個配搭幾特別。朋友就揀咗博多雞白湯，濃郁嘅湯底之中帶點辣味，叉燒係用雞肉製成，麵質亦唔錯。我朋友最鍾意食蔥，仲特登加$8追加咗青蔥。拉麵仲可以加$25追加滿腹套餐，咁就有齊小食同飲品。我哋就揀咗唐揚炸雞，雖然外表比較深色，但其實裏面嘅肉質仍然保持鮮嫩，佢嘅調味亦做得唔錯。另外就揀咗羽根餃子，煎得夠香脆，個人認為唔使點汁都咁好食。仲想食啲蔬菜類，所以就試吓呢個柚子味付蓮藕片，蓮藕片非常爽口，帶有柚子味嘅蓮藕我都係第一次食，味道都幾得意。加$25嘅套餐揀選支裝麥茶都唔需要加錢，我覺得幾抵飲。