位置係商業大廈內，門面平平無奇，內在別有洞天，昏暗嘅燈光，
配一啲殘舊英式皮椅，深木桌椅，牆上有啲隨意畫作！加一個日式吧枱，上面有好多日本酒，西式撞日式。又奇怪地配合！氣氛好適合傾偈！唯一男店員係接電話嗰位！因為只有我兩個客（星期六晚上咁嘅情況，都幾擔心）所以任得肥髀揀位，佢揀咗中間一張長枱，
坐低店員送上餐牌及水（檸檬味水，好清新），仲問我係唔係頭先打電話嗰位，同我講小朋友唔使最低消費！
我話想要甜品餐牌（佢比我嗰份只有主菜、小食及飲品！）佢叫我望牆上黑板，上面寫晒今日甜品，佢仲好有心將雪櫃內有嘅甜品款式攞晒出來比我哋揀，不過無抹茶味嘅，我問佢有無抹茶味蛋糕，佢好爽快話仲有一件，而肥髀問有無白玉丸子嘅甜品，佢又明！加杯西村咖啡！佢即刻預備！
綠茶芝士蛋糕（$48）賣相平實，芝士蛋糕軟滑，抹茶味濃，無甘味，唔會好甜！唔膩好味！
白玉丸子抹茶雪榚（$52）呢個要等一陣，我唸係白玉丸子要時間煮再放涼，丸子好多，質感煙韌，好彈口，無餡都好好味！紅豆唔多，唔會好甜，增加甜糯口感，雪榚好大球，抹茶味濃，好滑！整體味道好味！
西村咖啡（$45）翠綠咖啡杯好搶眼，咖啡夠熱，糖奶用個玻璃方碗另上，奶油係名牌子，好滑，加埋咖啡啡糖，咖啡味濃微甘，都易入口，一支糖唔會好甜！配甜點食剛好！
環境好舒服，肥髀一邊食一邊睇書，聽住日本歌！食物不錯，餐具用心男店員上每款食物，好細心咁比兩支叉！完全唔打擾我！食完我比肥髀去比錢，個男店員好有心機慢慢等佢！仲好好笑容同我哋講再見！臨走見有第二批客人！一來已經不停同男店員講日文，我唸呢間隱密嘅小店都係做熟客多！
