六點左右入到去唔算好多人
仲有窗邊位坐，望到yoho戶外花園環境
同glasshouse 嘅設計好配襯
感覺好舒服
我哋叫咗一個二人晚餐額外再單點一個主菜
二人套餐都幾抵食
入邊有晒前菜、餐湯、主菜、甜品、飲品
餐湯係「意大利蔬菜湯」
好濃郁嘅蕃茄味
而且菜嘅份量都頗多
店員仲好細心拎兩個小碗俾我哋分享
前菜我哋叫咗「炸薯條配黑松露蛋黃醬」同「炸雞粒拼單骨雞翼」
炸薯條真係不得了，夠熱夠香夠脆
作為薯條控既我真係要比好高分佢
薯條外面包着一層脆衣
所以每一條都好脆
媽媽仲一路食一路讚
未食過咁好食嘅薯條
仲清晒旁邊嘅黑松露蛋黃醬
炸雞粒都炸得唔錯
夠熱又唔會好油
單骨雞翼好脆，少少微辣
飲品額外叫咗「芒果雲霧」同「紅豆椰子冰」
芒果雲霧係芒果沙冰上邊有厚厚嘅椰奶
味道好清甜，唔會有化學嘅芒果味
紅豆椰子冰係椰子沙冰
我見爸爸飲得好開心應該味道都唔錯
「香辣龍蝦意粉」
呢一個意粉套餐要額外加$28
分量都算幾多
而且炒得非常有鑊氣
食到入邊加咗蒜蓉、金不煥、辣椒
好有東南亞風味
龍蝦肉嘅份量都唔孤寒
「美國頂級西冷配秘製京醬」
牛扒同樣需要加$28
用鐵板上碟，送到黎嘅時候仲出緊煙
配菜有大量洋蔥辣椒青椒
香味十足，旁邊嘅薯仔都係煎過好好食
牛扒我叫五成熟
切開仲係淡淡嘅粉紅色
肉質軟嫩，容易入口
亦唔會太多筋
配嘅秘製京醬酸酸甜甜
我建議點少少就足夠
老人家一定要食飯先滿足
所有額外加咗「馬拉盞炒飯」
同樣炒得好香好有鑊氣
味道配得好好，唔會好咸
入邊有大量蝦仁
少少微辣嘅味道會令人食唔停口
套餐有包兩個甜品
有「是日甜品」同「即焗牛油軟曲奇」
是日甜品係隨機的
今次係朱古力波波入邊有好濃郁嘅朱古力慕絲
味道唔算好甜，口感都非常厚實
牛油軟曲奇送來嘅時候是非常之熱
曲奇充滿牛油香味
上面配上冰凍嘅雲呢嗱雪糕
一凍一熱嘅感覺係超級好味
我見我哋有四個人
就貪心額外叫多咗一個「脆皮雲呢拿疏乎厘」
呢個要多人分享先食得晒
上碟嘅時候見到超級大個
趁熱切開蓬鬆嘅疏乎厘
一定要超級快食晒
如果唔係就會縮
呢個爸爸媽媽都讚好好食
有蛋香，而且脆皮令到疏乎厘嘅口感更加有層次
總結：餐廳環境舒服，而且店員都有禮貌
嘢食好啱我嘅口味，偏向東南亞風
淨係價錢都唔算貴，合理價錢
一定會再嚟食😍
