今次一家四口叫咗兩款湯底, 包括雞湯同藥膳辣湯。雞湯味道好濃郁, 真係有雞件係入面, 所以真係無味精; 而本身我對藥膳嘅味道麻麻, 但今次加埋辣味, 出乎意料地好味, 可能啲辣平衡返個種藥味。
我地叫咗澳洲特上長期穀飼牛沖繩豚放題套餐, 幾款薄肥牛味道唔錯, 牛味夠, 唔需要太多調味料都好味, 口感好嫩滑, 值得推介; 因為我係牛肉控, 所以對我來講牛舌、豚肉就普通啲。
食物吧都有唔少選擇, 正常打邊爐嘅野都有, 特別要讚一下有蓮藕, 因為我地都幾鍾意食; 而最吸引小朋友嘅, 又點會係正經野, 一定係新裝修後添置嘅朱古力噴泉、棉花糖機, 可以比小朋友自己參與少少製作既過程, 都係好開心! 當然不得不提嘅係Häagen-Dazs雪糕任食啦!
