之前已經一直好想去試下啲甜品，
難得今次夾到時間, 我就立即BOOK定位。
我地比原定時間早了10分鐘到達, 店員細心為我地安排去梳化位置,
亦向我地介紹TEA SET 嘅鹹/甜點分類,
因為好友是素食者(不吃肉, 可吃海鮮)關係,
店員悉心將其中一人份嘅鹹點轉咗做素食, 非常貼心。
正因為要轉做素食關係, 所以製作需時, 就趁食物未到嘅時候,
我地就欣賞到呢間餐廳位於K11 MUSEA中庭「Opera Theatre」的核心,
望到周邊結合咗零售與文化藝術元素,
加上商場播著令人心曠神怡嘅音樂, 真係非常適合嚟享用美食嘅環境。
TEA SET 食物包括:
(鹹點) 焗龍蝦魚子醬撻, 柑橘酸汁醃北海道刺身帶子伴鮮菓,
法式鵝肝及焦糖洋蔥煙豬腩撻,煙三文魚青瓜三文治, 海膽多士, 龍蝦濃湯
(甜點) 特濃朱古力焦糖撻, 開心果奶凍, 士多啤梨法式千層酥,
冧酒提子及經典英式鬆餅及乳酪忌廉+自家製紅桑梅果醬
店員先送上龍蝦濃湯、蘑菇湯給我及好友, 龍蝦湯味道好濃,
好友嘅蘑菇湯都好濃, 出色。
柑橘酸汁醃北海道刺身帶子伴鮮菓: 柑橘酸汁真係好酸,
突出咗帶子刺身嘅鮮甜
法式鵝肝及焦糖洋蔥煙豬腩撻: 焦糖洋蔥配襯出濃濃的鵝肝,
出奇地感覺到焦糖洋蔥煙豬腩好似叉燒醬嘅味道
特濃朱古力焦糖撻: 鍾意朱古力嘅朋友一定鍾意
士多啤梨法式千層酥: 超脆嘅千層酥, 士多啤梨較酸, 好開胃
英式鬆餅配乳酪忌廉: 做得幾好, 牛油味香, 但唔會過重, 推介
整體都好滿意, 服務都好加分。
