舖頭雖然係細細，小店一間，但係食物種類非常齊全，而且非常美味！
🍹飲品
大家分別叫咗泰式奶茶、龍眼冰、青檸梳打。正常嘅質素，飲奶茶嗰位朋友話好有泰國奶茶嘅風味。
🍍 菠蘿炒飯
呢啲係基本泰國菜菜式，冇諗過都炒得唔錯，幾有鑊氣。
🥗 通菜馬拉盞
同樣都係有鑊氣嘅馬拉盞炒菜，蝦醬非常出色，帶出菜嘅鮮味。
🧆 大大小食拼盤
本來諗住叫好多唔同種類，但係見到呢個拼盤，我呢啲懶人就唔使諗就叫啦！有豬肉包生菜，有春卷，蝦餅，肉丸，雞翼。每一樣都有特色。尤其係生菜包豬肉，豬肉炒得好友泰國香料嘅味道。
🦀 麵包咖喱軟殼蟹
聽老闆娘講呢個菜式係餐廳主打。軟殼蟹蛋漿非常Juicy，而且鑊氣什勁，麵包外皮又脆，點麵包食一流。
🍲 泰北冬陰功湯
冬陰功湯，係正常嘅泰國餐廳水平嘅發揮。要讚嘅係， 裏面嘅海鮮非常新鮮。
🥭 芒果糯米飯蛋糕🎂
開頭以為芒果糯米飯蛋糕得個樣，點知個糯米飯非常煙韌，芒果又好甜，非常優質。
因為事前同老闆娘講有所準備，老闆娘特地播上泰文版生日歌，氣氛非常好。當日響舖頭，夾埋我哋，有三台人都叫呢個蛋糕響呢度慶祝生日！竟然有三個壽星仔，同時響同一間舖頭，感覺好有趣！大家互相慶祝生日快樂，好開心😆😆
總括嚟講，今日呢一場非常之好食，而且氣氛好好，最緊要係朋友仔過生日過得好開心，大家朋友仔出嚟gathering，最緊要就係開開心心呀嘛。如果係想試吓唔同嘅生日蛋糕嘅滋味，泰灜呢一間餐廳真係好值得推薦大家去。
