Pizza Piazza

Open Now

Now Closed

今日嚟到呢邊食lunch，依間餐廳門外擺放Menu俾客人睇，佢嘅午餐都好吸引，就選擇咗依間喇。在餐廳外面望入去因為下午玻璃反光睇得唔清楚，原來入去之後座位坐得好舒適。佢嘅椅有墊，坐得舒服。另外佢裝修同埋格局感覺乾淨簡潔，星期六下午有路少客人，亦都見到有外國人光顧。本來被門口嘅burger廣告吸引左先，但慢慢望吓餐牌嘅選擇好多,特別係佢有好多唔同款式嘅薄餅。最後我選擇咗招牌至尊薄餅set lunch😊首先上餐湯，係西蘭花蓉湯。呢款湯比較少飲，入口粒粒蔬菜，感覺健康。拼上牛油及餐包，夠熱，外皮有少少似法包嘅脆硬，但味道係麥香味重，小小咸，好味。之後就到呢個招牌至尊Pizza！佢係薄底Pizza，餅底夠硬脆, 及有麵粉香味。餡料分布亦都好均勻同埋好足夠，我平時好少食橄欖，但係呢度嘅橄欖都好容易入口，配合埋火腿、菠蘿、蕃茄、芝士等等一齊食，味道好夾。跟餐另外加水牛城雞翼，味道係香辣酸酸地，雞翼好入味，雞肉好滑。餐飲我選擇左果汁梳打，西柚味。真果汁味，甜度適中，帶少少西柚嘅苦澀，好清新！呢度食物質素唔錯，侍應態度友善，地點都幾方便，荔枝角地鐵站行過嚟幾分鐘。下次可以考慮約朋友出嚟依度食飯傾計。