地點：銅鑼灣時代廣場
菜式：新加坡菜
餐牌：茶餐11選一，有多款飯粉麵，配冷熱飲品9選一，可以加錢升級餐飲。另外仲有小食同甜品。另收加一。
32
花漾海南雞飯 $78 另加一
海南雞有脾有胸有翼，份量都唔少，雞皮滑而雞肉頗嫩，配上三色醬比你自己調味。
伴有青瓜四舊解膩。
雞油飯大大碗，濕潤度剛好，味道唔錯。
仲有一碗魚蛋蔥花冬瓜湯，味道鹹香，冬瓜味濃，原來入面有脆口八爪魚粒，仲有彈牙炸魚蛋兩粒。
新加坡大蝦喇沙摻摻 $78 另加一
新加坡大蝦喇沙可以揀摻摻或者米線。我地揀左摻摻。摻摻即係黃色粗麵加幼身粉絲，前者有咬口又滑溜而後者幼滑吸汁，加埋係好正嘅口感。個湯又香又滑，梛汁又夠，辣辣地好惹味。配料有去殼凍蝦兩隻開邊，彈牙炸魚蛋三粒，炸魚蛋有好多條，豆卜4件，同半隻糖心蛋。其他配料仲有爽口芽菜，少少通菜同洋蔥絲，加上脆脆，口感豐富。
街頭雞肉串燒 $80 另加一
街頭雞肉串燒一客4串，啖啖肉好嫩，個黃咖哩汁好濃味。伴有半粒車厘茄，青瓜幾塊同紫洋蔥。另配惹味參峇醬，令雞肉更惹味！
班蘭咖吔多士 $36 另加一
班蘭咖吔多士一客四份，係兩塊麵包份量。麥包整得好香脆，入面係一片厚厚牛油同班蘭咖吔醬，食落甜甜地，係一個幾好既。
1
海鹽雪糕椰汁珍多冰 加$12 另加一
椰汁好滑又香甜，帶唔少碎冰可以咬下，仲有綠色珍多冰，口感豐富。原來椰汁配融化既海鹽雪糕味道好夾，甜中帶微微鹹，好特別。呢個價錢好抵，飲完直頭係食完甜品。
馬來拉茶 （跟餐）
馬來拉茶好滑溜，叫左少甜，甜度都適中。茶同奶味道配得好，唔錯唔錯。
香茅青檸荔枝梳打（跟餐）
跟餐飲品都有幾款揀。香茅青檸荔枝梳打真係有大大枝香茅，味道完全唔甜，似梳打水，解渴得黎又唔會太肥，荔枝味道主要係底部，建議搞起先飲。
總括而言，茶餐份量似正餐，不過價錢平好多，仲包大大杯野飲，食物質素都好高。座位舒適，裝修勁靚。平日兩點要等幾個字先有位。
