NeNe Chicken (東港城) (Closed)

朋友話去劉在石嗰間食炸雞嘅韓國餐廳食Lunch，無追開韓國綜藝節目嘅我根本唔知佢講邊個，係咁追問劉先生係邊個。去到原來係一間喺將軍澳少有嘅韓國餐廳，餐廳唔算太多人，我哋一行四人叫咗5個精選午餐加1個比較細份小食，惠顧午餐3份會送最平嘅1款，份量都幾多，所以幾個人嚟都幾抵㗎。芝味吉列豬扒，豬扒係無用調味料醃到好鬆嗰種，有咬口，但無咩味，脆漿有啲硬，芝士少夾起外層脆漿同豬扒分開，呢個餐無咩汁，食落有啲乾。碎芝士蕃茄意大利粉，上面舖滿芝士，可以拉絲，汁料似濃湯，意粉唔會太淋，配醃蘿蔔酸酸哋，唔錯。鮮蝦蛋包炒飯，蛋皮全熟但入口嫩滑，蝦仁亦唔少，飯入味有少量芝士，配上茄汁令口感更豐富。蘑菇炒粉絲，雖然味有啲濃但係好惹味，但成碟一片蘑菇都無。首爾三寶，因本人唔食得辣所以汁另上，炸餃子3件，炸年糕5件，炸紫菜粉絲卷5件，餃子脆卜卜，年糕細細粒煙煙韌韌， 紫菜粉絲卷口感豐富。炸雞達人，7件唔同口味嘅無骨雞件，雞肉外脆內嫩滑，只有一種味少辣，唔食得辣嘅我亦可接受，食得出嘅有大蔥炸雞，白郡主炸雞韓式甜辣炸雞，初雪炸雞，有一種係有芥末味。左邊係凍紅醋茶，右邊係Nene Soda青提子。