食過幾次，主菜試過西班牙黑豚肉日本元貝台灣麵(幾國際化)，豚肉嫩，肥瘦適中，肉味偏淡，中和返鮮雞湯底嘅濃厚。元貝直情係一嚿嚿咁堆上嚟，慷慨程度令人感動。個麵好滑但唔會無口感，最勁抽係啲蔥，竟然用日本京都九条蔥，係唔係好過分？老闆娘傻咗！而我！感動到哭_咗！
小食玫瑰露雞翼，酒香慢慢滲出嚟，好過癮，鹵水有層次唔係咸咁簡單，隻隻size一樣，肉厚又嫩滑，揀過先奉客，誠意有眼睇。
最最值得介紹係甜品🍮，至今試過幾款，金箔龍眼冰粒粒龍眼都咁大咁圓，新鮮生果嘅清甜爽口，無得呃人。老闆娘話男朋友做果欄生意，所以入到揀手貨🤪😋
另外試過芋圓杏仁露，個杏仁味好濃、好香，食緊都覺得補，塊面白咗兩度。芋圓軟綿綿有咬口，好治癒。
至於椰汁芋頭糖水係最新嘅潮州風系列，我從未食過咁杰嘅芋頭糖水，食到芋頭絲同蓉，好飽足，不計功本，真心顛。
超親切健談嘅老闆娘話自己開店都係尋開心，鍾意煮，又鍾意分享，唔講賺錢，我信咖，你去試一次就知！
