日月台灣料理 (Closed)

山長水遠來到小西灣探朋友, 由於人生路不熟, 完全唔熟識呢附近有咩好食嘅地方, 都係打算隨便搵一間食店醫下肚食個午飯。嚟到個富欣花園嘅一間台式小店, 睇落門口啲食物相片都好吸引, 即管入去試一試啦。<香脆排骨滷肉飯> 賣相吸引, 用料新鮮美味, 排骨(即係豬扒)炸得好香好脆, 內裡鮮嫩多汁, 配菜加咗少少日本黃蘿蔔, 令人好開胃。 滷肉份量亦啱啱好, 唔會太膩滯。連飯都好講究, 一粒一粒, 唔會太淋亦唔會太梗。鹵水蛋做得好好味。<秘製鹽酥雞滷肉飯> 最平食多幾間台灣料理, 佢哋嘅「鹽酥雞」都幾好味, 但點知真係一山還有一山高, 呢度嘅「鹽酥雞」真係驚為天人 , 要大聲講一句:「真係好好味呀!」 同樣地佢嘅配菜、鹵水蛋、飯都一樣, 非常好!套餐附送台灣凍奶茶, 非常出色。用嘅杯亦好有特色。用餐期間睇見隔離客人食嘅台式撈麵及湯麵, 以及一啲「蚵仔擔擔麵」, 都好吸引。客人都一路食一路稱讚。下次一定要再嚟試其他菜色! 據知佢哋嘅「招牌紅燒牛肉麵」, 因為好食得街知巷聞, 賣得好快, 好似今日咁, 晏晝兩點鐘就賣曬喇。好可惜, 下次一定要嚟試, 等等我呀！