個蛇羹真係好神奇，啲素肉既樣係同蛇肉一模一樣，真係呃得下人！
生炒糯米飯當然就唔係生炒架啦，賣到咁平仲做生炒會蝕架，不過味道都唔錯。平時好少機會食到冇肉既糯米飯，今次食到覺得好滿意。
牛仔肉冇乜特別，個份量就有少少呃秤。睇落以為好大份，原來舊錫紙入面係墊高左，真實份量獵火減左一半，大家要留意下。
素翅燉椰皇係每日限量發售架，如果想食既話最好早啲去，或者book位果陣叫佢地留定比你，如果唔係好大機會冇得食。個湯好清甜，啲椰肉夠哂稔，輕輕力就筆到出黎食。
啲仿魚生都係來貨，同其他有仿魚生既素店出品一樣，都係蒟蒻做既人工野，耐唔時食下都幾過癮。
北京片皮鴨其實就唔係好似鴨架喇，不過我鐘意食佢塊薄餅同埋醬，包埋一齊食細細個啲回憶返晒黎。啲人成日話啲素食者食素肉係齋口唔齋心，其我地都係想回憶下以前既日子啫。
十幾蚊就有一碟高麗菜，仲話係有機既添！大家又信唔信咁平有有機菜食呢？係既話真係益街坊！
上湯浸翡翠苗整得幾好，啲菜苗煮得恰到好處，唔會有陣臭青味，而且夠新鮮冇乜渣，唔錯。
依個竹筒飯真係要讚下啲姐姐！打開果陣係咁既樣，食落有少少乾，我地都不以為然照食。食食下有個姐姐行過，佢大驚，仲話依個竹筒飯煮得太耐，乾哂，要換過一個比我地。
過左陣佢拎過第個竹筒飯黎，打開發現淺色好多，而且仲濕潤子多。好彩姐姐發現到幫我地換左，如果唔係都唔知自己食左啲咩落肚。
松子魚個汁比較杰，可能個芡落得重手左少少，但個味都so far so good，啱啲鐘意食酸甜野既人。
生煎包個餡偏乾，始終素叉燒比較難做到真叉燒比較juicy既感覺，趁佢做半價試下冇壞。
黎左三次對員工既態度改觀不少，如果你地都曾驚比佢地嚇怕過，不妨比次機會佢地，會有全新既體驗。
