喺門口等嘅時候見到唔同嘅菜單，有百日宴、冬至、甚至乎外賣盆菜都可以，岩曬呢個12月做冬/聖誕/公司annual dinner一連串嘅節日活動黎聚會食飯。
除左一般常見嘅點心外，酒樓亦有好多唔同嘅新款點心，我地就叫左蟹粉小籠包、鮮蝦帶子鳳眼餃、蘿蔔千絲天鵝酥、春風得意腸，齋聽個名已經吸引。
蟹粉小籠包：小籠包裏面充滿金黃色嘅湯汁，將柔軟而薄薄嘅外皮打開，蟹粉嘅鮮香味隨即四溢，十分香濃。當我地咬開嘅時候，滿滿嘅湯汁都喺嘴裏爆開，幸好冇辣親咀。
山竹牛肉球：鮮嫩多汁嘅牛肉混入馬蹄增加口感，搭配腐竹增添香氣，加埋唿汁，最愛呢個味道。
鮮蝦帶子鳳眼餃：同平時食開嘅蝦餃相比，呢個鮮蝦帶子蝦餃除左賣相精美，口感亦更為出色。蝦餃外皮煙韌，內餡更為飽滿，蝦肉嘅鮮甜口感充分展現出黎，鮮嫩多汁，仲有加埋帶子更增添鮮甜嘅味道。
蘿蔔千絲天鵝酥：普通嘅炸蘿蔔絲經過廚師悉心製作後，變得更為名貴。用餅乾製作成天鵝頭，再用炸蘿蔔酥造身體，創意無限。味道亦非常出色，外層酥脆，內裏柔軟，蘿蔔香甜，令人印象深刻。
蟹籽燒賣皇：燒賣皇採用蟹籽作爲餡料，香氣撲鼻，一咬落去，漲卜卜非常飽滿，肉質彈口，調味恰當，能感受到燒賣鮮甜味道。
藥膳鳳爪：媽媽試左啖湯，非常欣賞。藥膳味道剛好，冇苦味亦唔會過重當歸味。鳳爪入口鮮嫩，浸泡喺藥膳湯中，獨特嘅香味同藥膳滋補功效，媽媽連湯都飲埋。
春風得意腸：喺腸粉入面包住炸蝦肉餡，腸粉皮薄香滑，肉餡有蝦、芫荽、蟹籽、粟米等，口感彈牙亦帶點清爽，而炸蝦亦炸到金黃酥脆；加上豉油，令炸蝦腸粉味道剛好，實在係心機作品。
椰汁馬豆糕：濃郁嘅椰香同奶味，甜度剛好，糕非常滑身同Q彈，而馬豆雖然冇乜香味，但係軟硬遇中，最後黎份香甜嘅糕點，涼浸浸食落冇咁濟，美味可口，讓人唇齒留香，係飲茶必叫甜品。
總結黎講，呢間酒樓嘅點心美味又精緻，令人留下深刻印象。此外，服務態度也非常周到，欣賞招待嘅姐姐，勤快有禮。今日媽媽都食得非常開心，下次可以再黎。
