門面同裝修都好日式，帶點時尚。
1
呢度嘅佈置都好有心機，連啲餐具碗碟，都相信係精挑細選， 好靚好精美，打卡一流。
1
我哋叫咗個 “和“ 二人前 套餐 （HK$1,680）
1. 沙律
個沙律都幾特別，有：
日本白粟米，parma ham包蘆筍，車厘茄，藍莓 配 麵豉油醋汁
白粟米 - 都幾甜，比較清香，粟米粒爽口
parma ham 包蘆筍 - 呢個組合原來都幾夾，好味。
2. 前菜
賣相勁靚， 貝殼同埋蟹仔擺喺舊石上面，真係似一個裝飾品多過一道菜式。
鬼爪螺 - 聽就聽得多，我係第一次食，要搣開外面層衣先食到入面嘅肉，味道比較清甜。
汁煮日本花螺 - 個汁勁正，螺肉滑得嚟又有啲爽甜。
小澤蟹 - 炸過嘅蟹仔，原隻食，香脆可口。
鐵板燒嘅主菜嚟喇，師父畀我哋睇下今日嘅食材， 一望就知好新鮮，啲料好靚!
3. 鹽焗南非鮑魚 配 鮑魚肝醬
鮑魚爽口彈牙，一定要切開佢點醬食。
個醬超級香濃，似係好多隻鮑魚嘅濃縮，可以將鮑魚嘅味道提升到另一個層次，並有提鮮嘅作用。
4. 喜知次 配 明太子汁 及 龍珠果
喜知次有深海紅寶石嘅稱號，亦都係其中一款我非常之鍾意食嘅魚。
師父煎到皮好脆肉又香，魚油又發揮得啱啱好，令到魚肉嘅鮮甜昇華，仲有少少入口即溶嘅口感! 每一啖都係滋味!
5. 北海道帆立貝 配 海膽忌廉汁 松葉蟹膏蟹肉 三文魚子
帆立貝煎到恰到好處，飽滿彈牙，蟹肉拆得好好，一啲殼碎都冇。 三文魚子清甜，完全冇腥味。
6. 虎蝦 （連蝦頭嘅蝦膏一齊烹調）
一上枱就有撲鼻而來嘅香味，令人食指大動! 隻蝦大隻到足夠兩人分享。
肉質超級爽口，可以媲美龍蝦，我地都覺得係全餐最喜歡嘅一道菜。
7. 鵝肝配 自製鍋粑 黑醋汁 無花果
肥美嘅鵝肝同脆脆嘅鍋粑係兩種口感，鵝肝好香。無花果最後食，味道清甜有解膩嘅作用。
8. 美國封門牛柳 配 鹽焗海苔 wasabi
牛嘅生熟程度啱好，外微脆，內軟嫩，一啲都唔韌，牛味都濃。
鹽焗海苔有啲似魷魚乾。
9. 魚湯
好勁嘅奶白色，超級濃味勁足料!
熱辣辣，大家都讚好好飲。
因為平時我都會煲魚湯，所以飲得出係一個好足料煲得好好嘅魚湯。
10. 砂糖多士
蜜糖味甜甜地，烤到薄脆嘅多士真係好正。
11. 炒飯
熱辣辣， 炒得乾身，粒粒分明，有少少薑味，感覺健康又好食!
12. 甜品
最後甜品係雪糕，有芝麻、綠茶同埋柚子味揀。
我要咗芝麻，芝麻味都幾濃，朋友話柚子味幾fresh。 甜品為今餐劃上完美句號。
服務方面，店員有禮，介紹食物都幾清楚，亦都幾勤力加茶。
我地好開心喺元朗搵到間咁正嘅鐵板燒，難怪閒日晚上都full曬。
