1
Strawberry Matcha Bonbon ($48)
下單後可以目睹店員即席以茶筅刷泡抹茶，加入日本士多啤梨果蓉同北海道鮮奶基底之上，甜度輕微令抹茶甘香份外醇厚；底層士多啤梨果蓉酸甜有致，果香天然毫不帶藥水香精之感；雖然士多啤梨同抹茶兩部分各自表現出色，但始終兩者之間並不算相當融洽，充分攪拌均勻後亦無可避免口味偏頗不均，喝到士多啤梨果蓉時抹茶味就顯得微不足道，反之亦然。
事實上，整杯飲品精髓所在在於面層堆積如山嘅抹茶忌廉，質感幼滑如絲而抹茶濃度亦相當出眾，初嚐一啖後完全欲罷不能，尚未開始飲用底部飲品前便已經吃了八成忌廉，尤其是忌廉上加上脆米豐富口感，即使單吃忌廉亦彷如品嚐一款獨立甜品一樣毫無膩感，喝罷整杯飲品後，禁不住連僅餘留在杯邊的忌廉亦刮得一乾二淨。
整體而言飲品質素其實甚高，雖然價格較一般茶飲店高，但感覺上物有所值，畢竟香港大多數抹茶飲品都只以現成抹茶糖粉或抹茶鮮奶沖劑製作而成，確確實實以茶筅刷泡抹茶盡展茶道的確是難能可貴，只不過個人口味問題仍然覺得抹茶和士多啤梨分道揚鑣會比較好，但下次仍會為著其他飲料如芝士抹茶丸丸再度到訪。
