我同朋友都好鍾意打邊爐🍲，大熱天時都無阻我哋嘅興致，星期日就幫襯咗位於旺角瓊華嘅「馬祖無限時台灣養生涮涮鍋」。
估唔到下午時段，餐廳都近乎全場滿座，而且客源涵蓋後生以至長者，人氣超高的👏。另一邊廂，餐枱夠晒大張，啱晒食放題。
1
我哋揀咗牛頸脊套餐🐮，週末夜晚七點前埋單只需$329位，仲要係真正無限時吃到飽。餐廳採用QR Code落單，上菜速度勁快，所以驟眼間就嗌到成枱都係。
打邊爐前，先來小食：黃金地瓜條💛🍠🍟，蕃薯條炸至外脆內軟，味道甜甜的，另外更有多種Shake Shake粉作調味。
涮涮鍋湯底有超過十款選擇，鴛鴦鍋加$48，我哋要咗藥膳椰子雞併麻辣蕃茄牛肉(小辣)。前者椰子香四溢🥥，味道清甜，適合淥菜同丸類。後者嗰款相反，蕃茄味濃郁🍅，調和咗辣度，小辣易入口。再者，個爐火候掂當，啲嘢好快淥熟！
套餐包嘅兩款牛質素唔錯🥩，最起碼大大片、唔會太薄，食落有質感。牛肉肥瘦均勻，肉味亦都強，兩款肉整體分別唔大，各有千秋。
黑色碟係Prime Grade安格斯牛頸脊，而白色碟就係Prime Grade美國安格斯牛肉。
我哋試咗其中一款豬🐷：西班牙伊比利亞黑毛豬，味道OK嘅，但脂肪位稍為多咗啲。
除咗肉之外，海鮮都係任點任食。是日精選有蜆、蟶子同生猛海蝦，🦐啲蝦好新鮮，口感彈牙。
手工配料方面🍡，我哋嗌咗梅菜豬肉丸同麻辣牛丸，估唔到每份有四粒，好彩細細粒。梅菜豬肉嗰粒幾夾，另一粒麻辣就好鬼辣🌶。此外，黑松露墨魚滑好正(無影相)，口感爽彈，黑松露勁香。
火鍋食材款式繁多，兼且唔係行貨。🦀足八吋長蟹棒好值得嗌，超市買都唔平，淥完唔易散，口感佳。🖤墨汁香腸可算係台灣食材，而墨魚腐皮卷就相對普通，略嫌口感偏淋。🧀醬爆濃芝牛丸高質，牛丸本身好彈，入面爆晒漿，超級流心。
每款食材份量都唔少，擺盤整齊。由左上數起分別係花膠片、鮮萵筍、海鮮菇、栗米件、牛柏葉同埋雜菇拼盤🍄。蔬菜類味道天然鮮甜，特別係粟米，啲菇都幾好。牛柏葉同響鈴(無影相)就係索湯之選。
本身油麥菜就冇乜好介紹🥦，但我想強調啲菜洗得好乾淨，而且塊塊葉都好翠綠，實在難得。
飲品方面🥤，大大個雪櫃幢咗喺度，佢有四款自家製泡茶，包括桂花烏龍、愛文芒果茉莉花茶、黑糖冬瓜檸檬茶同埋日月潭蜜香紅茶。我全部試晒😛，其中無糖嗰兩款(即烏龍同紅茶🍵)比較清新，亦可解膩。
最後仲有甜品🍨，但就唔係任點，按人頭計。雪糕款式有齊幾個大牌子，例如Häagen-Dazs、MOVENPICK同Dryers等。
2
餐廳自助區只係放置咗醬料吧同湯底瓶，咁樣其實仲好，冇開放式凍櫃，衛生得多👍。
總括嚟講，而家市面上開咗唔少台式任食火鍋店🇹🇼，雖然大家有唔少共通點，不過我認為馬祖喺各方面都較為優勝。火鍋食材多選擇、質素高😋，全部都係任食，絕無花假啊。溫馨提示：食物份量有啲難預，加上無限時，建議可以慢慢嚟～。
1
1
