沐白小農 (Closed)

台灣茶飲店一向出色，其中一間來自台灣桃園嘅人氣店沐白小農早前進駐咗澳門三盞燈，幾個月前終於都喺香港開店喇！第一間店選址元朗，新店以木質裝潢同白色嘅磚牆為主，同台灣店嘅文青風一致，鋪面簡潔，透明度高，可以見到廚房嘅內部同埋沖泡過程。好多人都喺呢面標誌性嘅白底藍字磚牆打卡。沐白小農堅持使用100%天然新鮮嘅用料，選用鮮牛奶，不加奶粉、奶霜，亦不加任何一滴水，採用全天然蔗糖、黑糖、桂圓醬、蜂蜜等。餐牌選擇不少，沐白黑糖波霸鮮奶、大甲芋頭鮮奶、草莓鮮奶等均為其招牌飲品，另外仲有好幾個飲品系列，分為茶好韻、小農沐場鮮奶、沐場茶拿鐵(鮮奶茶)、濃醇鮮豆乳、沐果特調等一共五個系列，定價$19-32，個別款式例如黑糖鮮奶、芋頭鮮奶等糖度固定，部分飲料設大杯裝，除咗同一般茶飲店有糖量同冰量可以選擇之外，沐白小農仲有埋溫度呢一個選項，相當細心。我揀咗沐白黑糖波霸鮮奶、大甲芋頭鮮奶同蜂蜜檸檬，全部都係用呢個咁得意嘅胖胖杯裝住，好可愛啊。沐白黑糖波霸鮮奶，啱啱攞到手嗰陣發現底層嘅波霸珍珠都仲係溫熱嘅！店員建議先搖動杯身，讓鮮奶與黑糖波霸珍珠充分融合；讓鮮奶溶有黑糖的香氣；讓本來熱軟嘅波霸珍珠，遇冷後變得Q彈。