，所以賴生今晚誠邀左屈小姐入黎元朗同賴生&朋友們食飯，順便慶祝朋友生日！
提提大家，如果黎呢間泰國野食飯，最好預先訂枱，因為唔訂真係有排等，超多人
！
平時賴生同屈小姐食飯都劇少會叫餐食，原因有3個，第一：覺得被人綁住，第二：通常餐包果d野大部份都唔好食既，好食既得1-3樣
，第三：賴生同屈小姐好少叫野飲同甜品既，你懂的⋯通常餐都有包⋯所以好多時，賴生同屈小姐都會犧牲叫野飲同甜品既錢而去散叫自己想食既野（加上野飲同甜品係好肥既～我地寧願用啲quota食其他野）！
不過，呢次真係比呢度既4人餐打動左⋯（唔加野飲連加一）除番開每人都只係$190蚊
再加上佢8個選擇有4-5樣我地都想食嫁
（PS: 唔記得影個4人餐menu
)
4人餐整體評分：
價錢：4星
份量：5星
味道：4.5星
選擇：4.5星
咁4人餐究竟係包D咩既呢⋯⋯？
A) 泰式小食五味拼盤 （4星）
拼盤全部都係炸野黎，超邪惡，有炸蝦餅，炸魚餅，炸南瓜，炸蕃薯，香葉包雞同炸春卷！全部小食都係水準之作，當中要特別點名讚既係，炸蝦餅，炸魚餅同炸春卷！
炸春卷：炸得超香脆唔滴油！
炸蝦餅：超彈牙，而內裡蝦膠好足料，一D都唔空心
炸魚餅：惹味！食落除左帶辣同泰國香料，魚味都好出！而且唔會炸過火變老添！
（P.S. 拼盤係其中一樣賴生同屈小姐唔會叫既野，但其實一大班Fd食係抵既！）
B) 椰汁雞湯 （4.5星）
由於賴生其中一位朋友唔食得辣咁濟，所以叫左椰汁雞湯（但呢度叫冬蔭功湯仲正）
味道主要係酸，酸得黎帶超級丁點辣味，飲落都會追住黎飲，除左開胃之外，因為佢熱住，所以飲落暖笠笠！加上好足料，有好多香茅，金不換！仲有好多雞肉，蕃茄仔同秀珍菇嫁！特別係蕃茄仔，好夾呢個湯，連湯食蕃茄既甜味更出眾！（ps 雞肉就有少少雪藏味，所以扣少少分）
C) 生菜肉碎包（4.5星）
好好味呀！酸辣兼備！極惹味，惹味到用黎撈飯食都得！入口先酸，刺激你味蕾，令你好提神！但當你以爲只係得酸既時候，辣就湧上黎，都ok辣嫁！呢個反而做到用酸味帶個辣味出黎，令唔太食辣既人比較易入口，當然生菜都要記一功啦！爽甜！同埋好多都好大塊，好好包！可惜生菜既份量都係差1-2塊
D) 去骨海南雞 （例牌）（4星）
個餐有無骨豬手同海南雞揀，梗係揀海南雞啦！我地上次食過豬手雖然係淋，但係唔夠入味既，所以今次試海南雞
海南雞肉滑！唔肥！點埋去個海南雞醬係超夾既！少辣微甜，唔會遮到雞肉味，記得點黎食！
E) 招牌咖哩軟殻蟹 （配蒜蓉包/印度酥餅）4.5星
呢樣就係我地揀呢間食同揀呢個餐既最大原因啦！
！軟殻蟹足足有2大隻！炸得好好，完全唔會食落成層油滲番出黎！加埋主角蛋黃咖哩汁⋯真係不得了！濃郁，香，甜，少辣集於一身，真係好食到停唔到口！！撈埋蒜蓉包真係好容易會令人陷入痴肥既陷阱！不過今次食就無上次咁好食啦，今次對屈小姐黎講就咸左啲，如果好似上次咁偏甜啲就會爆分啦
（註：因為係4人餐，個份量係少過main menu散叫嫁）
蒜蓉包亦係必食item之一！佢係成條蒜蓉條咁嫁！4面都搽滿蒜蓉牛油，本身焗得超脆，似多士條咁，無論就咁食定撈咖哩食都係超一流享受！（註：又係因為4人餐所以得4條，散叫就有6條）
F) 泰式鮮蝦炒金邊粉 （4星）
個賣相好令！用塊蛋皮包住個炒金邊粉
！入面有4塊大鮮蝦+茄汁炒金邊粉，食之前加埋個青檸汁更佳，酸酸甜甜好好食，加上大大塊蛋皮放入口好滿足😌！個茄汁味都好出
G) 馬拉盞炒芥蘭 （2.5星）
呢樣係個餐既唯一失望既，你當普通炒芥蘭食就ok，因為唔夠入味！但呢度個馬拉盞炒椰菜苗好正嫁，可惜餐冇得揀
H) 是日甜品 （4星）
係椰汁西米糕2件+椰青糕2件！
椰汁西米糕：好得意！同出面食既唔同，佢係帶少少咸咸地嫁！但你又唔會抗拒佢有咸味，因為係先甜後咸既！
食落無咁濟嫁
椰青糕：好味！清，香，甜！質感挺身!入面仲有椰子肉嫁
！
最後，佢跟餐可以用半價跟4杯特飲或者沙冰既，我地揀左椰汁珍多冰，椰汁三色冰，咸檸七梳打同士多啤梨沙冰！我地只係飲左椰汁珍多冰，所以只講呢樣
I) 椰汁珍多冰 （3.5星）
椰味都可以，唔太甜！入面既泰國啫喱絲都好滑身，唔錯
不過呢，我地其實5個人黎（2男3女），驚唔夠食，所以另外散叫左2樣野，再加多個散叫蒜蓉包！
J) 泰式醃生蝦 （味道5星，CP值2星，總分：3.5星）
過氣壽星女之選！佢指定要食！其實又真係好好味！蝦好新鮮，蝦肉勁爽口彈牙！辣椒好夠辣，但千祈唔好睇少粒蒜⋯粒蒜都係勁野黎！佢帶左香味同攻鼻外，佢仲將辣味提升
！辣到屈小姐流眼水+打嘶egg（賴生表示：陰公豬囉）
不過$148 得8隻真係貴左D，我諗我會比大約108食！
K) 鐵板蠔仔蛋 （3.5星）
份量可以！蠔仔好多呀！
！不過蠔味就滲唔到入蛋度，不過要靠個醬令蠔仔蛋加味，建議點埋黎食！甜甜辣辣，釣起番啲蛋味同蠔味！
另外想一讚既係呢度既service，佢地係極極極忙，可能語氣好似重少少，但其實佢地好樂意幫你既，係要比少少時間佢地
今餐我地5個人係飽飽飽到癲既，懷疑其實淨叫個4人餐都夠食
#飽到極致
#搞笑的fd子sss
#呵呵呵，屈小姐都要入局啦
#補祝生日
#好開心見到你熟晒啦慣晒啦
#講番之前既野好好笑又好開心
#SoSweetToBeWithU
#真心推介
