小店裝潢雖然簡單，但係並唔代表馬虎。牆上貼滿一幅幅特色畫作，環境舒適整潔。
海難雞飯既雞肉非常嫩滑，外皮有彈性，感覺上一啲都唔油膩，亦唔會好肥。值得一讚係海南雞已經去骨，可以一啖食晒，感覺更加爽，仲有三種口味嘅醬汁可以搭配添！油飯散發淡淡香味，同爽滑嘅雞肉非常夾。再飲埋杞子雞湯，成個餐雞味濃郁，愛食雞嘅朋友要試試啦。
串燒包括有豬肉同雞肉各3串，燒完好香好惹味。再點埋特製沙嗲醬，初入口味道香辣後帶少少甜味。加上醬入面帶有少許花生粒粒，更加有多重口感。豬肉串食落肉汁豐富，好香口；雞肉串嫩滑，質感比較軟。
鍾意重口味可以試下，味道濃烈得嚟有少少辣，好惹味又有鑊氣！濃濃嘅醬汁煮到上面各樣食材都好入味，特別係大蝦，將原本嘅爽甜蝦肉加添一分惹味，層次更豐富。
肉骨茶以豬骨、豬肉同埋中藥材熬製，藥材份量非常多，好足料！無論聞落定食落藥材味道都相當濃郁，湯內嘅豬肉煲到又腍又入味！據聞肉骨茶仲有行氣活血嘅功效，鍾意食肉骨茶嘅朋友一定要試！
食喇沙個湯底真係好重要！呢個湯底有少少辣，椰香十足又有好香花生味，味道香濃。麵條彈性十足，唔會一夾就斷。加埋豐富海鮮，有蝦、蟹棒、帶子、魚片、豆卜同埋糖心蛋，將每樣食材浸入香濃湯底，加倍鮮味！
