先點飲品，我揀左法國白提汁，係白酒廠用嘅白提子造成，飲落好幼滑好香甜。
生蠔叫左每款2隻，因為買一送一，折左都係40幾蚊1隻，分別叫左pinky, krystal, ancelin special, gillardeau, 我覺得最正係ancelin special, 蠔身好爽好厚肉，一食有一陣海水咸鮮味，食落非常鮮甜，after taste 好甘香，鮮味長留不散，值得一試。
餐包係自家制，好鬆軟，個皮仲脆脆地，配獨創嘅香草茄子汁同辣肉腸南瓜醬，食餐前飽都變左一種享受。
前菜我揀左法式油封鴨腿塔，制作油封鴨腿好考功架，呢度做食味道非常好，保持到肉質嫩滑，鴨肉咸香，配上蕃茄他他，中和油膩感。
龍蝦湯，好香濃，飲得出落足料，如果可以嘅話，我想加個白飯
跟住黎個香煎鵝肝，鵝肝厚切，兩邊煎脆，帶海鹽胡椒調味，內裡嫩滑juicy, 鵝肝味濃郁，真係會愈食愈開心！非常邪惡！
餐廳細心安排左蕃石榴雪芭，清一清味蕾，飽左8成，終於食到主菜，我揀左燴澳洲和牛牛面頰，上枱份量好有睇頭。
一切開見到燴到肉質已經鬆軟到化開，條理分明，食落非常軟滑，帶點膠質黏黏嘅口感，牛肉可以做到呢個柔軟嘅口感，真係好巧手！
飽滿感100分，最後上個櫻桃乳酪芝士慕絲，完成慶生節目，姊妹們當然非常開心滿足。
700幾蚊可以係香港食到頂級法式水準，媲美5星級酒店嘅法式自助餐水準，絕對值回票價。
