Rustico

之前行開D2 Place，發現樓下竟然有間門面非常歐式嘅bistro，原來係西班牙餐廳嚟😌 望入去裝修同環境都好靚，好似去咗歐洲啲家庭式經營嘅小餐館咁，於是前排就拉埋屋企人去try try佢😋

Sangria

$278

本身我唔係好好紅酒，但唯獨sangria因為加咗水果而令我冇咁抗拒🤣 佢呢度嘅sangria飲落偏甜，易入口，幾啱我呢啲唔鍾意酒味太濃烈嘅人飲🙌🏻

脆炸鱈魚球配蜜糖泡沫

$98

呢個鱈魚球係店員推介嘅小食，果然冇介紹錯！鱈魚球內裡薯蓉十分綿密，係融合咗西班牙風味嘅馬介休球，再點埋個蜜糖製嘅泡沫醬汁，呢個配搭又幾新鮮🤪

傳統烤焗多士

$58

嗌咗呢個多士真係令我大開眼界😯 原來店員會即場幫我哋喺多士表面塗抹上有機蕃茄仔、生蒜同埋淋上橄欖油，可謂真嘅「即叫即整」🤣 而味道亦都好唔錯，不過可能加蒜嘅時候重手咗少少，食落都有啲辣🫣

西班牙燴牛肚鷹嘴豆辣肉腸醬汁

$148

呢個燴牛肚又幾特別，第一次食以西式方法烹調嘅牛肚，牛肚燴得好腍，亦好索汁，加上個汁辣辣哋咁，好惹味😗

初榨橄欖油浸香蒜海蝦配香脆多士

$148

呢個蝦同樣幾唔錯😚 幾鍾意佢個醬汁，加咗橄欖油好香，加上索晒蝦嘅鮮味，用嚟點多士一流！而啲蝦都幾新鮮，食落爽口彈牙，唔係嗰啲霉霉哋嘅蝦🤞🏻

RUSTICO特色西班牙炸蛋

$108

呢個名為「Broken Egg」嘅菜式係呢度嘅招牌菜😋 係將一大堆薯絲、流心蛋、辣肉腸碎同拌埋一齊食，味道好夾！不得不讚佢個薯絲真係炸得好香脆😌

慢煮西班牙乳豬伴香草焗薯

$338

佢呢度嘅乳豬有別於其他餐廳，係以慢煮嘅形式烹調嘅，慢煮令到肉質非常嫩滑🤤 但同時佢嘅外皮亦都十分香脆，點上粗鹽食一流😚

1

招牌西班牙黑毛豬海鮮飯

$238

佢呢度嘅paella亦好特別，除咗有蝦、青口同蜆之外，仲加咗黑毛豬🤩 加上少許檸檬汁，令成個飯食落更有鮮味，但佢有別於其他paella，口感較濕潤，不過同樣好食👍🏻

傳統西班牙Churros

$72

Dessert Time😽 最後我哋嗌埋churros食，鮮新炸起熱辣辣🤤 肉桂粉超多，再夾埋個朱古力慕絲同埋雲呢拿雪糕一齊食，prefect match!

總括而言，呢間西班牙小餐館真係比到我好似去咗歐洲嘅感覺，非常鍾意佢嘅餐廳環境😍 加上佢嘅菜式都好唔錯，特別推介佢嘅慢煮乳豬，真係做到皮脆肉嫩😳 下次都會再嚟幫襯🤞🏻

同你一齊搵更多好嘢食😋