同女友撐枱腳，嚟到觀塘工廈隱世中菜館「盈苑」🌆。推開木門就聽到輕快廣東歌🎵，暖黃燈光襯住水泥牆身，卡位闊落仲有啲懷舊鐵窗花🪑。雖然唔係高級場，但成間店飄住陣陣蝦醬香，睇嚟今晚有口福啦～！
🦑蝦醬椒絲通菜鮮魷煲
一上枱就「啫啫」聲🔥！蝦醬鹹香衝鼻但唔會死鹹，通菜吸晒醬汁依然爽脆🥬，鮮魷份量夠晒多，咬落彈牙無雪味。最正係底層嘅蒜頭同肥豬肉粒，撈飯一流！份量夠3-4人share，兩個人食到要打包呢📦。 (4.5/5)
🦆京式片皮鴨
師傅即場片皮好有睇頭🔪！鴨皮脆到似餅乾，皮下保留薄薄脂肪層，夾住青瓜絲同蜜瓜條好清新🍈。特別讚個自製山楂醬，酸甜balance咗油膩感。可惜餅皮得8塊略嫌少，鴨架可以揀煮粥或椒鹽，我哋加$38要咗椒鹽版本，炸得酥脆送酒啱晒🍺！ (4/5)
埋單$600有找，飽到捧住個肚行出海濱散步🌉。呢度嘅鑊氣同人情味，絕對值得encore！下次想試吓佢個黃湯雞煲翅呢～👫💕
