銅鑼灣道鮨日本料理可謂近期試過比較有水準嘅廚師發辦，位於渣甸中心，上左樓，加上係月初先開業，估唔到平日晚上都有咁多客人，相信靠口碑傳開。打開電梯，可見餐廳裝潢走傳統日式風格，以木色為主，布簾、流水、竹葉等，環境清幽。（但好搞笑，播嘅係kpop，哈）
圍繞吧枱，最接近師傅嘅位置，約可坐七、八人，記得預訂位置。師傅就喺面前製作，透明度高，亦係廚師發辦嘅一大特色
師傅根據當日新鮮食材，設計餐牌，可以享用當季魚生，而如果有特別需求，可向師傅提出，較為個性化。當晚約有八位客人，師傅都好細心，照顧到每位需要
試左定價每位$1200嘅omakase set，整餐飯接近兩個半鐘，氣氛歡愉，亦不時提出有關食材嘅資訊，可以見到每道菜嘅配搭都係經過精心安排。
前菜：鴨胸、粟米湯
鴨胸軟諗，加上醬汁，幾開胃；粟米湯凍上，呷一口為以下美食作開始。
1
真鯛刺身
先食魚背，再食魚腹，可算係食過最為鮮味嘅鯛魚，魚片爽脆
醬油八爪魚
八爪魚新鮮，味道濃烈，底下墊有昆布，吸收醬油，保留八爪魚鮮味
赤貝刺身
一向係我個人私心之選，赤貝大粒，加上即磨山葵，帶出鹹鮮味
清酒鮑魚
鮑魚薄片，味道香濃，配上赤醋米飯，一口接一口。
梭子魚壽司
梭子魚屬春夏時令魚，面頭輕輕燒開，魚味濃郁，完全唔腥。
海膽魷魚壽司
魷魚黏身而爽，海膽份量大方，入口軟滑，平時唔係太喜歡海膽，係怕遇到唔新鮮嘅海膽，食廚師發辦基本上會食得好放心。
車海老壽司
赤醋飯配山葵，加上新鮮車海老配搭，邊個唔鐘意。
地蛤壽司
加上醬油，突顯肉身鮮甜多汁，爽口唔韌，平時比較少食到咁大粒厚肉。
烤白子
第一次食白子，聽就聽得多，烤白子微稠魚油感，口感好軟熟，難怪咁多人一試愛上。
生蠔
蠔身肥美大粒，配酸汁冇咁膩口。
青柳貝裙邊、青柳貝壽司
青柳貝味道清甜，貝肉爽身薄脆。
毛蟹壽司
蟹腳鮮甜。
三文魚籽壽司
面頭以金箔點綴，更加豪華。三文魚籽粒粒飽滿，魚肉四溢，鮮味十足
海膽手卷
海脆份量多，唔算好濃味嘅，口感軟滑，入口即溶，適合我呢種平時唔係太沉迷海膽嘅人。
拖羅壽司
唔係屬於油脂好多嘅部位，粉嫩色澤，食落較爽。
最後，師傅都好貼心，仲問我地夠唔夠飽，可以來一個熱烏冬，但我地已經好飽
昆布清湯
清湯製作有誠意，昆布都係自家製，味道清淡暖胃。
靜崗蜜瓜
一大片蜜瓜，瓜肉多汁香甜，作為結尾，取代甜品，相當滿足
