難得嚟到就想食多啲甜品，就叫咗一個正餐兩個甜品，上菜擺盤幾靚，正餐同甜品都唔錯，但未去到好驚豔，不過牛乳軟雪糕的確一流，下次可能外賣一下雪糕😜
煙腩·白菌·温泉蛋芝士汁燴意大利鮮蛋麵 $95 （7/10）
好好奇鮮蛋麵嘅味道所以叫咗個嚟試吓，會話同伊麵差唔多薄身，無意粉口感咁彈牙，但我自己都係鍾意彈牙少少嘅口感所以覺得唔太特別🙂 醬汁嚟講非常唔錯，鹹鹹地類似卡邦尼汁但唔會太濃，加埋温泉蛋都幾creamy, 但係鮮蛋麵唔算太索汁所以整體食落比較油膩，個人覺得少少可惜
朱古力·Oreo 北海道5.0牛乳·軟雪糕芭菲 $66 （8/10）
牛乳軟雪糕可以話實至名歸地好食😚 牛奶味好重，雪糕好creamy好滑，質地幾厚實，如果淨係雪糕嘅評分可以話接近滿分💯可惜係剩餘嘅芭菲就無乜特別，朱古力只係呈現喺面頭嘅朱古力粉同底嘅乾朱古力脆脆米同好甜嘅朱古力醬，oreo部份只係兩塊oreo餅撈埋cream夾喺中間嗰層，相比起雪糕會話無乜特別同有啲失望🙂↕️
宇治抺茶梳乎厘班戟 $118 （6/10）
梳乎厘班戟好彈，蛋味都好濃，有兩大pat紅豆醬都幾豐富～面頭淋滿綠茶醬，但綠茶味無想像中濃，反而其實有少少海鹽同芝士味，但綠茶撈芝士鹹鹹地同我想像中嘅茶香味有啲出入，有少少怪🥹同埋蕨餅唔知點解會有啲薄荷味，咬落似啫喱嘅感覺，反而無煙韌嘅口感，同想像中嘅味道有啲落差
